Eignarhald OR: Boðað til eigendafundar

Samþykkt var á stjórnarfundi Orkuveitu Reykjavíkur sem var að ljúka nú skömmu fyrir fréttir, að eigendafundur verði haldinn sem fyrst þar sem eignarhald á Orkuveitunni verður rætt.

Ummæli stjórnarformanns Orkuveitunnar, Haraldar Flosa Tryggvasonar, í Morgunblaðinu í gær, um mögulega einkavæðingu fyrirtækisins hafa fallið í grýttan jarðveg hjá minnihlutanum í stjórn OR.

Sóley Tómadóttir, borgarfulltrúi vinstri grænna í stjórninni, lagði á fundinum fram tillögu um að eigendafundur verði haldinn sem fyrst þar sem farið verður yfir umræðu um eignarhaldið, og var það samþykkt með öllum atkvæðum minnihlutans, en aðrir fulltrúar ýmist greiddu atkvæði á móti tillögunni eða sátu hjá.

Sóley fór ennfremur fram á að málið verði tekið fyrir á dagskrá borgarstjórnar á þriðjudag.

Hún leggur áherslu á að það komi í ljós hvort meirihlutinn í borgarstjórn hefur fallið frá því áhersluatriði sínu að halda Orkuveitunni í opinberri eigu.

Ef svo er ekki telur Sóley einsýnt að meirihlutinn þurfi að endurskoða umboð stjórnarformannsins til að gegna stöðu sinni.