Innlent

Bjarni segir starfið leggjast vel í sig

Bjarni tekur til starfa 1. mars.
Bjarni tekur til starfa 1. mars.
Stjórn Orkuveitu Reykjavíkur hefur ákveðið að ráða Bjarna Bjarnason jarðfræðing og verkfræðing forstjóra fyrirtækisins. Hann tekur við starfinu af Helga Þór Ingasyni, sem ráðinn var tímabundið í ágúst 2010. Bjarni tekur til starfa 1. mars. Umsækjendur um starfið voru sextíu talsins og hefur ráðningarferlið staðið frá 28. september.

Bjarni segir að starfið leggist vel í sig en að hann geri sér jafnframt grein fyrir því að staða Orkuveitunnar sé erfið og að mörg og flókin verkefni bíði úrlausnar. Orkuveitan sé fyrirmyndar fyrirtæki á margan hátt og samfélaginu mikilvæg. Því sé það forgangsverkefni að greiða úr rekstrarvanda félagsins en til þess þurfi samhenta vinnu starfsmanna, stjórnar og eigenda á næstu misserum.

Haraldur býður Bjarna velkominn

Haraldur Flosi Tryggvason, stjórnarformaður OR, býður Bjarna velkominn til starfa hjá Orkuveitunni. Ljóst sé að víðtæk reynsla hans nýtist Orkuveitunni vel í þeim ögrandi verkefnum sem framundan eru. „Mér sýnist þetta vandaða ráðningarferli hafi skilað okkur traustri niðurstöðu," segir Haraldur Flosi.

Bjarni hefur verið forstjóri Landsvirkjunar Power, dótturfélags Landsvirkjunar, frá 2008 en áður var hann framkvæmdastjóri orkusviðs Landsvirkjunar um sjö ára skeið. Bjarni hefur sinnt ýmsum stjórnunarstörfum á ferli sínum, m.a. sem tæknistjóri Jarðborana hf., framkvæmdastjóri Kísiliðjunnar í Mývatnssveit og forstjóri Íslenska járnblendifélagsins á Grundartanga. Bjarni er varaforseti Alþjóða Vatnsorkusamtakanna, International Hydropower Association.

Bjarni las jarðfræði í Háskóla Íslands og lauk B.Sc. prófi árið 1981. Þá tók hann licentiat-próf í námaverkfræði frá Tækniháskólanum í Luleå í Svíþjóð 1986.


Tengdar fréttir

Forstjórinn valdi fyrrum yfirmann sem eftirmann

Bjarni Bjarnason verður næsti forstjóri Orkuveitunnar samkvæmt ákvörðun stjórnar fyrir­tækisins í gær. Bjarni er forstjóri Landsvirkjunar Powers, dóttur­félags Landsvirkjunar.

Vill að ráðningarferli vegna forstjóra OR verði rannsakað

Kjartan Magnússon, fulltrúi Sjálfstæðisflokksins í stjórn Orkuveitu Reykjavíkur, vill að borgarlögmaður eða innri endurskoðandi borgarinnar verði falið að fara yfir ráðningarferli forstjóra Orkuveitu Reykjavíkur. Kjartan ætlar að leggja fram tillögu þessa efnis á næsta borgarráðsfundi.

Óviðunandi vinnubrögð vegna ráðningar nýs forstjóra OR

Verulegar brotalamir eru á vinnubrögðum meirihluta stjórnar Orkuveitu Reykjavíkur vegna ráðningar nýs forstjóra fyrirtækisins. Í síðasta mánuði felldi meirihluti stjórnarinnar tillögu undirritaðs um að óháð ráðningarstofa tæki ferlið í sínar hendur til að tryggja óháð og vönduð vinnubrögð.

Framkvæmdastjóra hjá Landsvirkjun boðið forstjórastarf OR

Bjarna Bjarnasyni, framkvæmdastjóra hjá Landsvirkjun, hefur verið boðið starf forstjóra Orkuveitunnar. Frá þessu var greint í kvöldfréttum Ríkissjónvarpsins en ákvörðun um þetta var tekin stjórnarfundi í dag. Af öllum líkindum verður greint formlega frá ráðningunni á morgun. Sextíu manns sóttu um starfið.

Stjórnarformaður Orkuveitunnar: Ráðningaferlið gagnsætt og faglegt

„Leitast hefur verið að gera þetta ferli eins gagnsætt og faglegt og mögulegt er,“ segir Haraldur Flosi Tryggvason, stjórnarformaður Orkuveitu Reykjavíkur. Stjórn fyrirtækisins ákvað í dag að ráða Bjarna Bjarnason, framkvæmdastjóra hjá Landsvirkjun, sem næsta forstjóra Orkuveitunnar. Tilkynnt verður formlega um ráðninguna á starfsmannafundi í hádeginu á morgun.

Vill fresta ráðningu Bjarna sem forstjóra Orkuveitunnar

Fulltrúi Sjálfstæðisflokksins í stjórn Orkuveitu Reykjavíkur vill að ráðningu forstjóra fyrirtæksins verði frestað. Hann hefur gert athugasemdir við ráðningaferlið en fyrir borgarráði er nú til meðferðar tillaga um að borgarlögmanni verði falið að skoða ráðningarferlið.

Mest lesið


Fleiri fréttir

Sjá meira


×

Mest lesið