Önnur plata Árstíða komin út

Þjóðlagahljómsveitin Árstíðir hefur gefið út sína aðra plötu, Svefns og vöku skil. Platan kemur út á vegum Nivalis ehf., sem er í eigu meðlima sveitarinnar, og það var Ólafur Arnalds sem annaðist upptökustjórn. Stutt er síðan fyrsta smáskífulag plötunnar, Ljóð í sand, fór í útvarpsspilun.

Árstíðarmenn eru nýkomnir heim úr þriggja vikna tónleikaferð um Rússland og Búlgaríu. Uppselt var á meira en helming þeirra níu tónleika sem hljómsveitin hélt í Rússlandi og áhorfendafjöldinn var að meðaltali um fjögur hundruð. Árstíðir koma næst fram í Kaldalóni í Hörpu 14. október á Airwaves-hátíðinni. Tvennir útgáfutónleikar verða svo í nóvember. Þeir fyrri verða í Hofi á Akureyri 11. nóvember og hinir síðari í Salnum í Kópavogi 19. nóvember.