Allt stefnir í allsherjarverkfall á mánudag

Félagsráðgjafar funduðu með fulltrúum frá Reykjavíkurborg hjá Ríkissáttasemjara í gær. Fundinum lauk upp úr hádegi án árangurs og er annar boðaður klukkan tvö í dag.

Félagsráðgjafar fara fram á 38 prósenta launahækkun. Fyrir fundinn, sem hófst klukkan 10.30 í gærmorgun, var ákveðið að taka ekki tilboði borgarinnar, sem hljóðaði upp á 10 prósenta hækkun. Allt stefnir því í allsherjarverkfall á mánudag.

Félagsráðgjafar sem starfa hjá Reykjavíkurborg eru 108 talsins. Þeir starfa flestir hjá þjónustumiðstöðvum borgarinnar, barnavernd og á skrifstofu velferðarsviðs. Ljóst þykir að verkfall muni raska starfsemi á þeim stöðum verulega.

Edda Ólafsdóttir, félagsráðgjafi hjá þjónustumiðstöð Miðborgar og Hlíða, segir verkfallið munu hafa miklar afleiðingar fyrir marga og þá helst undirmálsfólkið í samfélaginu. „Við erum að berjast fyrir jafnrétti innan borgarinnar og erum langeygar eftir kjarabótum og að starf okkar verði metið til jafns við aðrar starfsstéttir," segir Edda. „Fyrir um fimm árum var ákveðið að fara í starfsmat hjá borginni og þar var okkur sagt að þar væri möguleikinn á að hækka í launum. Það hefur ekki gerst."

Edda bendir á að til samanburðar megi geta þess að samkvæmt kjarakönnun frá árinu 2010 voru verkfræðingar hjá Reykjavíkurborg með 499 þúsund krónur að meðaltali í föst mánaðarlaun og tæknifræðingar með 465 þúsund krónur. Ofan á það bættist svo yfirvinna.

Til viðmiðunar megi taka dæmi af heildarlaunum 55 ára félagsráðgjafa með 20 ára starfsreynslu sem voru í febrúar í fyrra 357 þúsund krónur og séu enn þá óbreytt.- sv