Skagastrákur stelur senunni í Bon Iver-myndbandi

„Þetta var bara mjög gaman og ekkert svo erfitt," segir hinn sjö ára gamli Skagapiltur Helgi Rúnar Bjarnason.

Helgi Rúnar þykir hafa stolið senunni í Bon Iver-myndbandi sem frumsýnt var á National Geographic-vefsíðunni á fimmtudag. Þar sést Helgi á röltinu um helstu náttúruperlur Íslands undir laginu Holocene sem finna má á nýjustu plötu indí-rokksveitarinnar. Myndbandið hefur vakið mikla athygli á netinu og um það hefur verið fjallað á helstu tónlistarsíðum heims, meðal annars heimasíðu Billboard-listans, Entertainment Weekly og Spin Magazine. Í gær höfðu 117 þúsund horft á myndbandið en því er leikstýrt af leikstjóranum Nabil sem hefur meðal annars unnið með rappstjörnunni Kanye West.

Helgi Rúnar leikur ekkert síður stórt hlutverk en íslenskar náttúruperlur á borð við Jökulsárlón, Svartafoss og Breiðamerkursand í myndbandinu. Og honum finnst bara nokkuð skemmtilegt hversu mikla athygli myndbandið hefur fengið. Hann hefur þegar sýnt vinum sínum það og þeim þótti töluvert til þess koma og að hans sögn voru þeir bara sáttir með frammistöðu hans fyrir framan tökuvélarnar. Sjálfur segist Helgi alveg geta hugsað sér að verða leikari en hann hafði ekki mikinn tíma fyrir spjall, hann var úti að leika sér.

Móðir Helga, Ingibjörg Kristín Barðadóttir, segir tökurnar hafa verið mikið ævintýri því þau hafi verið stödd fyrir austan þegar brúin yfir Múlakvísl fór. Þau hafi því þurft að leggja á sig sjö tíma ferðalag aftur heim um Fjallabaksleið nyrðri. „Leikstjóranum fannst það hins vegar skemmtilegast og mér sýnist stærsti hlutinn af myndbandinu hafa verið tekinn þar. Við vorum allavega alltaf að stoppa og taka eitthvað upp." Ingibjörg bætir því við að hún hafi ekki átt von á því að myndbandið myndi hljóta svona mikla athygli og raun ber vitni. „Við vissum í raun ekkert hver þessi Bon Iver var og datt aldrei í hug að þetta myndi vinda svona upp á sig."

freyrgigja@frettabladid.is