Helmingi fleiri fá undanþágu hjá LÍN

Veittar undanþágur til greiðenda Lánasjóðs íslenskra námsmanna (LÍN) hafa meira en tvöfaldast síðan árið 2008.

Samkvæmt upplýsingum frá Haraldi Guðna Eiðssyni, stjórnarformanni LÍN, má einna helst rekja fjölgunina til þess að í kjölfar efnahagshrunsins og aukinna greiðsluerfiðleika einstaklinga jukust umsóknir um undanþágur og rýmkaði því sjóðurinn á árunum 2009 og 2010 skilyrði til að fá undanþágu frá greiðslu.

Í fyrra voru veittar undanþágur tæplega þrjú þúsund, eða 2.938 og 5 prósenta hlutfall af öllum greiðsluseðlum. Árið 2008 voru veittar undanþágur 1.231 og 2,2 prósenta hlutfall af greiðsluseðlum. Í flestum tilfellum eru undanþágurnar til komnar vegna þess að greiðandi hefur aftur hafið lánshæft nám, er atvinnulaus eða á örorkubótum.

Eins og áður sagði var ákveðið á síðasta ári að auka svigrúm til að fá undanþágur frá greiðslum. Einnig var komið á nýju greiðsluúrræði þar sem fólk gat fryst afborganir í allt að þrjú ár. 370 manns nýttu sér úrræðið, en þurftu með því að sýna fram á greiðsluerfiðleika til að eiga rétt á frystingu. Haraldur útskýrir að með þessum úrræðum hafi sjóðnum tekist að vissu marki að mæta því efnahagslega ástandi sem ríkt hefur hér á undanförnum árum.

Haraldur segir að þrátt fyrir þessa miklu fjölgun greiðslna sem veittar hafa verið undanþágur fyrir, standi sjóðurinn vel.

„Auðvitað er betra þegar fólk getur staðið í skilum en þetta skapar ekki bein vandamál fyrir Lánasjóð íslenskra námsmanna,“ segir hann. „Greiðslurnar verða ekki niðurfelldar eða afskrifaðar og stóra myndin er sú að við getum tekið svona tímabundnu ástandi.“

Haraldur segir að tölfræðin fyrir árið í ár sé enn tiltölulega ómarktæk þar sem flestir greiðendur hafi aðeins fengið annan af tveimur greiðsluseðlum sendan, en síðari gjalddagi er 1. september næstkomandi. „En við sjáum það af tölunum að hugsanlega aukist vanskil eitthvað í ár, það kemur þó ekki endanlega í ljós fyrr en árið er gert upp,“ segir hann.

sunna@frettabladid.is