Hátt í hundrað lögreglumenn verða á vakt

Búist er við miklum fjölda í miðborg Reykjavíkur á Menningarnótt, næstkomandi laugardag. Lögreglan á höfuðborgarsvæðinu mun auka löggæslu til muna og segir Stefán Eiríksson lögreglustjóri að fjöldi lögreglumanna á vakt muni líklega nálgast hundrað.

„Þetta er eina nóttin sem byrjar að morgni og stendur út nóttina. Undanfarin ár hafa nálægt hundrað lögreglumenn staðið vaktina og þetta verður svipað í ár,“ segir Stefán.

Ókeypis verður í strætó allan daginn og er fólk hvatt til þess að nýta sér þann kost eða tvo jafnfljóta. Stefán segir að lögreglan muni ekki hika við að vera með sektablokkina á lofti ef ökumenn kjósi að leggja bílum sínum ólöglega. Miðborgin verður meira og minna lokuð fyrir bílaumferð allan laugardaginn.

Kostnaður Höfuðborgarstofu, sem stendur að hátíðinni, er fimm milljónir króna, líkt og á síðasta ári. Landsbankinn styrkir hátíðina um 2,5 milljónir og Vodafone kostar flugeldasýninguna, sem mun kosta á bilinu 2,5 til 2,8 milljónir króna.

Sif Gunnarsdóttir, forstöðumaður Höfuðborgarstofu, segir þennan kostnað einungis taka beint til viðburða og skipulagningar.

„Ekkert af þessum peningum er að fara í skrifstofukostnað eða annað slíkt. Það kostar líka að loka götum og hreinsa borgina eftir Menningarnótt,“ segir Sif.

„En það erum auðvitað ekki við á Höfuðborgarstofu sem erum að búa til þessa hátíð. Það eru þeir mörg þúsund manns sem eru að framkvæma þessa 350 viðburði. Þetta er ótrúleg hátíð. Á hverju ári verður til einhvers konar galdur og ég verð alltaf jafn hissa.“

- sv