Priyanka dúxaði

„Ég vissi að ég myndi fá ágætar einkunnir, enda lagði ég hart að mér, en ég bjóst aldrei við þessu,“ segir Priyanka Thapa, 23 ára Nepali, sem dúxaði í verk- og raunvísindadeild háskólabrúar Keilis en útskriftin fór fram í gær.

Námið á háskólabrú tekur eitt ár og klára nemendur sem samsvarar um 80 framhaldsskólaeiningum á þeim tíma. Nemendur sem fara hina hefðbundnu leið í framhaldsskóla ljúka 18-20 einingum á hverri önn ætli þeir að klára á réttum tíma.

Priyanka var með meðaleinkunnina 9,03, og hefur nú þegar fengið inni í lyfjafræði við Háskóla Íslands.

Priyanka hefur töluvert verið í fréttum síðustu mánuði eða frá því að hún sagði sögu sína í Fréttablaðinu um síðustu jól. Þar kom fram að ef hún fengi ekki dvalarleyfi á Íslandi biði hennar þrældómur í heimalandinu.

Móðir hennar, sem er einstæð, á orðið erfitt með að framfleyta sér og fötluðum syni sínum. Hún tók því til þess ráðs að gefa Priyönku fertugum manni sem hefur lofað að sjá fyrir fjölskyldunni. Priyanka hefur aldrei hitt manninn og vill heldur búa hér á landi og afla sér frekari menntunar.

Útlendingastofnun synjaði henni um dvalarleyfi af mannúðarsjónarmiðum – taldi ekki nægar sannanir fyrir því að hún yrði neydd í hjónaband eða að hennar biði ómannúðleg eða vanvirðandi meðferð í heimalandi sínu. Ögmundur Jónasson átti fund með forsvarsmönnum stofnunarinnar og var mál Priyönku tekið upp að nýju.

„Nú ætla ég að senda mömmu bréf og segja henni að ég hafi dúxað í skólanum og sé komin inn í lyfjafræðina. Ég vona að hún skilji núna af hverju ég vil vera hérna áfram,“ segir Priyanka.

Hún á ekki til orð til að lýsa þakklæti sínu við alla þá sem hafa stutt hana á þeim tíma sem hún hefur dvalið hér.

„Ég er svo þakklát öllu starfsfólkinu og öllum kennurunum hjá Keili, þau gáfu mér þetta tækifæri. Ég get heldur ekki lýst því hvað ég er þakklát fjölskyldu minni hér á landi, sem treysti mér og gaf mér innblástur, sem og öllum vinum mínum,“ segir Priyanka.

kristjan@frettabladid.is