Skoða aðgerðir vegna ofsaaksturs á hálendi

„Það er umhugsunarefni hvort eðlileg viðbrögð séu að fylgja fordæmi ýmissa nágrannaþjóða okkar þar sem gert er ráð fyrir að innlendur aðili sé með í öllum ferðum um viðkvæm svæði.“

Þetta segir Svandís Svavarsdóttir umhverfisráðherra spurð um hvernig megi bregðast við tilvikum eins og háskaakstri á vegum tékkneskrar ferðaskrifstofu. Auglýsingar hennar um ferðir til Íslands byggjast meðal annars á háskaakstri trukks um óbyggðir.

Tékkneska ferðaskrifstofan Adventura býður upp á Íslandsferðir með farþegatrukkunum Tatrabus. Kynningarmyndband á vegum hennar sýnir svo ekki verður um villst að þar hefur ekki verið farið að lögum og reglum sem gilda hér á landi. Myndefni sýnir hvar trukknum er ekið greitt eftir vegarslóðum og yfir á með farþega á þakinu.

Stundum er ekið á svo miklum hraða um óbyggðir landsins, að því er sést á myndbandinu, að trukkurinn rennur til að aftan í beygjum, og rykmökkurinn teygir sig langar leiðir aftur undan honum. Þá má sjá myndir þar sem trukkurinn situr fastur þar sem hann hefur sokkið í jarðveg á hálendinu.

Þetta aksturslag hefur haft í för með sér að stundum hefur munað mjóu að illa færi. Nýjasta dæmið átti sér stað fyrr í mánuðinum þegar trukkurinn sökk í Blautulón.

Rúmlega tuttugu tékkneskir ferðamenn voru á ferðalagi í honum, ásamt tékkneskum bílstjóra, en aðeins helmingur þeirra var í bílnum þegar honum var ekið út af vegarslóða. Þarna mátti litlu muna, því síðasta farþeganum var bjargað þegar bíllinn var kominn á kaf. Vart þarf að spyrja að leikslokum hefði allur hópurinn verið í trukknum þegar hann sökk.

Svandís segist þakka fyrir að ekki hafi farið verr í því tilfelli, en augljóslega hafi ekki verið gætt fylltu varúðar.

„En varúð snýst ekki bara um að gæta öryggis heldur líka að bera virðingu fyrir náttúru og viðkvæmu umhverfi,“ bætir hún við.

Þá mátti litlu muna að illa færi í september í fyrra þegar fyrrnefnd rúta og jeppi mættust í blindbeygju. Rútunni var þá ekið á öfugum vegarhelmingi. Ökumaður jeppans náði að bjarga lífi sínu með því að beygja bíl sínum upp í hæð sem var við veginn, og henda sér í farþegasætið, að því er RÚV hefur greint frá.

Ferðaskrifstofan hefur nú fjarlægt myndefni sem sýnir háskaakstur á Íslandi af heimasíðu sinni.

Svandís segir málið ekki heyra beint undir hennar ráðuneyti, þar sem ferðamál séu undir iðnaðarráðuneyti.

Hún bíður nú eftir skýrslum um málið og björgunina við Blautulón, en mun í framhaldinu ræða næstu skref við iðnaðarráðherra.

jss@frettabladid.is, thorgils@frettabladid.is