Ný starfsgrein varð til með næturopnun

Á bilinu sextíu til sjötíu manns vinna hjá Securitas við öryggisgæslu og afgreiðslustörf samtímis. Í raun má segja að um nýja starfsgrein sé að ræða hér á landi sem á tilurð sína að þakka næturopnunum verslana, en yfir fjörutíu verslanir á höfuðborgarsvæðinu eru nú opnar allan sólarhringinn.

Sigurður Karlsson, rekstrarstjóri 10-11, telur að um fimmtíu verslanir á landinu öllu séu nú opnar um nætur. Securitas hefur nú opnað nýja deild hjá sér sem einungis sinnir þessari þjónustu.

Árni Guðmundsson, framkvæmdastjóri gæslusviðs hjá Securitas, segir að slíkir starfsmenn hljóti sérstaka þjálfun til að sinna þessu starfi og að hún sé nokkuð frábrugðin þeirri sem hinir hefðbundnu öryggisverðir fái.

Hann segir að Securitas hafi byrjað að bjóða þessa nýju þjónustu árið 2008 en það ár nýttu um tuttugu verslanir sér hana. Sama ár hóf Securitas samstarf við 10-11 en þar áður höfðu starfsmenn verslananna staðið næturvaktirnar. Sigurður Karlsson segir að árið 2008 hafi fimm verslanir verið með næturopnun en nú eru allar 23 verslanir 10-11 opnar allan sólarhringinn, nema verslunin í Firðinum sem lokað er á miðnætti.

Gunnar Ingi Sigurðsson, framkvæmdastjóri Hagkaupa, segir að fyrirtækið hafi fyrst prófað þessa næturopnun í verslun sinni í Skeifunni fyrir jólin 2008. „Þá átti þetta bara að vera svona jólaþjónusta og einnig hugsað til að dreifa álaginu sem fylgir þessum tíma en kúnninn tók þessu svo vel að við ákváðum að halda þessu áfram," segir hann. Í sumar var síðan ákveðið að hefja næturopnun í verslunum fyrirtækisins á Akureyri og á Eiðistorgi og verður ákvörðun tekin um það í haust hvort framhald verður á.

„Þetta hefur fengið fínar viðtökur, til dæmis hringdi í okkur kona sem var afskaplega ánægð með stæltan öryggisvörðinn í Garðabæ sem afgreiddi hana um krem og var öllum hnútum kunnugur í þeim efnum," segir Gunnar Ingi kankvís.

jse@frettabladid.is