Krafa um enn stærri reiðhöll Gusts seinkar framkvæmdum

Hestamannafélagið Gustur vill að staðið verði við samkomulag um að Kópavogsbær reisi reiðhöll sem sé 80x36 metrar. Kópavogsbær hefur samþykkt að kanna kostnað við byggingu slíkrar reiðhallar, en einnig við höll sem verði 64 x 34 metrar. Guðríður Arnardóttir segir að í raun hafi yfirvöld hafnað stærra húsinu.

Líkt og Fréttablaðið greindi frá í hefur bæjarfélagið keypt hesthús af eigendum í Glaðheimum og hafa hesthúsin verið flutt að Kjóavöllum. Samningur var gerður við Hestamannafélagið Gust um að bærinn tæki yfir eignir félagsins, en reisti í staðinn nýja aðstöðu að Kjóavöllum. Það hefur ekki verið gert.

Guðríður segir að það skýrist af efnahagshruninu, bærinn geti einfaldlega ekki tekið lán fyrir framkvæmdum en þurfi að nýta rekstrarfé til þeirra. „Dráttur á því að framkvæmdir hafi hafist á Kjóavöllum er meðal annars tilkominn vegna þess að ekki hefur náðst samkomulag um stærð reiðhallarinnar, en í fjárhagsáætlun ársins 2011 var gert ráð fyrir að bygging hennar mundi hefjast á árinu."

Hermann Vilmundarson, formaður Gusts, segir hugmyndir um annað hús stangast á við samninginn. „Þetta snýst fyrst og fremst um að bærinn er að brjóta samninga sem hafa verið gerðir." Hann segir að vel geti málið endað í minni reiðhöll, en félagið vilji fyrst og fremst koma að hönnun. „Ég á nú eftir að sjá þá reisa þessa reiðhöll."

Guðríður segir að þegar fjármunir séu af skornum skammti verði bæjaryfirvöld að fara vel með þá, enda sé það skylda þeirra að gæta hagsmuna allra bæjarbúa. „Það er okkar mat að miðað við aðstæður og efnahag séum við að koma verulega til móts við Hestamannafélagið Gust, enda ljóst að þær áætlanir sem menn höfðu árið 2007 geta engan veginn staðist í dag í breyttu umhverfi."

Samningaviðræður eru í gangi á milli bæjarins og hestamannafélagsins, en Guðríður segir töluvert bera á milli hugmynda um stærð hússins. Samkvæmt samningum átti einnig að reisa skeiðvöll við húsið, en Guðríður bendir á að fyrir á svæðinu séu skeiðvellir í eigu hestamannafélagsins Andvara, sem er úr Garðabæ. Frá árinu 2006 hafi staðið til að hestamannafélögin á Kjóavöllum sameinist.