Þurrkar tefja uppskeru sunnanlands

Miklir þurrkar víða í sveitum sunnanlands auk síðbúins vorhrets í lok maí valda því að uppskera garðyrkjubænda verður tíu dögum til tveimur vikum síðar í ár en undafarin ár. „Í fyrra byrjuðum við að selja kartöflur í annarri viku júlí en það verður ekki fyrr en um næstu mánaðamót sem við getum byrjað núna,“ segir Sigurbjartur Pálsson, kartöflubóndi á Skarði í Þykkvabæ.

Friðrik R. Friðriksson, ræktunarstjóri hjá Jöfra á Flúðum, tekur í sama streng en þar er ræktað kál í útigörðum. „Þetta hefur ekki skemmt neitt en gerir okkur samt lífið leitt því uppskeran er tíu dögum seinni nú og við höfum bara staðið í því að vökva dag og nótt,“ segir hann.

Sigurbjartur segist nú vonast eftir góðri tíð í júlí og ágúst svo uppskeran geti verið jafnmikil um sig og í fyrra. Uppskeran var góð í fyrra en þá uppskar Sigurbjartur 350 til 400 tonn. „Ég setti niður í sambærilegt land núna þannig að ef allt gengur upp á þetta að vera svipað í ár en annars er kartöflurækt eins og lottóið, maður leggur undir á vorin og svo sér maður hvernig dettur úr pottinum á haustin,“ segir Sigurbjartur.

Spurður hvaða áhrif þessi seinkun hafi segir Friðrik. „Þetta styttir náttúrulega markaðstímann. Kálið sem borðað var í síðustu viku var ekki íslenskt kál.“ Hann segist nú vona að Kári verði ekki snemma á ferðinni svo að markaðstíminn styttist ekki líka í hinn endann.

Íslensk veðrátta virkar greinilega ekki eftir neinni jafnaðarreglu því örlítið austar unir Ólafur Eggertsson bóndi sér vel í vætutíðinni sem ríkt hefur undir Eyjafjallajökli. „Hér er ekki vandamál með þurrk það er frekar allt of blautt,“ segir Ólafur. „Ég er satt að segja orðinn svolítið þreyttur á þessu, það gengur svo hægt hjá mér að heyja í þessari veðráttu. En ég hef svo sem ekki ástæðu til að kvarta, hér er korn og repja allt mjög fallegt, mikill heyfengur og túnin fallega græn.“ Hann segir það þekkt fyrirbæri að fjallaskúrir væti grund undir Eyjafjallajökli þegar þurrkar ríkja annars staðar á svæðinu.

jse@frettabladid.is