Rosaleg góð auglýsing fyrir Steed Lord

„Við erum hérna í tíu daga heimsókn. Ákváðum að koma við á leið okkar heim frá Evrópu þar sem við vorum að spila,“ segir söngkonan Svala Björgvinsdóttir en hljómsveitin Steed Lord hefur haft í nógu að snúast síðan lag þeirra hljómaði í einum vinsælasta raunveruleikaþætti Bandaríkjanna, So You Think You Can Dance.

„Að vera með lag í svona stórum þætti er rosalega góð auglýsing og ekkert nema gaman að því. Við fengum svakalega góð viðbrögð í kjölfarið og lagið, Vanguardian, hoppaði beint á rafræna vinsældalista iTunes í Bandaríkjunum,“ segir Svala og bætir við að þau séu að fá mikið af tilboðum um að spila út um allan heim vegna þáttanna.

Það eru skemmtilegir tímar framundan hjá Steed Lord en þegar þau koma aftur út til Los Angeles þar sem sveitin er búsett, tekur við vinna við nýja plötu og klipping á nýju myndbandi. „Við förum beint í að klippa nýtt myndband við lagið Bed of Needles en það unnum við í samstarfi við danshöfundinn Sonyu Tayeh. Við fylgjum því svo eftir með mikilli herferð á netinu og tónleikatúr á vesturströnd Bandaríkjanna,“ segir Svala en sveitin er byrjuð á nýrri plötu sem á að koma út í byrjun næsta árs.

Svala ætlar samt ekki bara að endurhlaða batteríin á Íslandi því hún ætlar að nýta tímann og seja fötin sín. „Ég er að selja öll föt sem ég hef átt hérna á Íslandi og losa heila geymslu. Ég hef alltaf átt mikið af fötum og skóm og eru sum fötin næstum ónotuð. Ég sel þetta allt mjög ódýrt því ég vil bara losna við allt,“ segir Svala en markaðurinn er á laugardaginn á Miðstræti 12 og hefst klukkan 12. -áp