Þremenningar ætla að starfa eftir stefnu VG

Þrír þingmenn sem gengið hafa úr þingflokki Vinstri grænna eru að íhuga að stofna nýjan þingflokk. Þau ætla að styðja ríkisstjórnina í málum sem eru í samræmi við stefnu Vinstri grænna.

Lilja Mósesdóttir, einn þremenninganna, segir erfitt að vera óháður þingmaður vegna skipulagsins í þinginu. Óháðir þingmenn komi ekki að ákvarðanatöku um dagskrá og feril mála, og séu oft síðastir til að frétta af dagskrá þingsins.

Lilja fundaði með Atla Gíslasyni og Ásmundi Einari Daðasyni um næstu skrefin í gær. Atli flaug af landi brott um miðjan dag í gær svo þau höfðu ekki tíma til að klára að ræða málið. Lilja segir ekkert liggja á, endanleg ákvörðun um stofnun þingflokks verði mögulega ekki tekin fyrr en eftir páska.

Spurð um stefnu þessa nýja þingflokks segir Lilja: „Við munum styðja ríkisstjórnina í öllum þeim málum sem samrýmast stefnu Vinstri grænna. Það kom vel í ljós í atkvæðagreiðslu í þinginu í dag [í gær] að við fylgjum meirihlutanum í flestum málum.“

Hún segir deilurnar innan þingflokks Vinstri grænna hafa snúist um fjögur mál; Alþjóðagjaldeyrissjóðinn, aðildarviðræður við Evrópusambandið, Icesave og fjárlagafrumvarpið. „Vissulega eru það stór mál, en þá þarf líka að semja um þau,“ segir Lilja.

Hún segir að fari svo að þau stofni nýjan þingflokk muni hann eiga meiri samleið með stjórnarmeirihlutanum en stjórnarandstöðunni, enda muni þau starfa eftir stefnu Vinstri grænna. Þau séu hins vegar óbundin af hvers kyns málamiðlunum sem þingflokkur Vinstri grænna geri í stjórnarsamstarfi við Samfylkinguna.

Spurð um eigin framtíð segist Lilja vera að skoða ýmsa möguleika. „Þá er ég ekkert frekar að tala um stofnun stjórnmálaflokks heldur en bandalag við annan flokk.“ Hún segist þó ekki ákveðin í að bjóða sig fram aftur í næstu þingkosningum. „Það hvarflar stundum að manni hvort ekki sé komið nóg, og ég er ekki sú eina á þingi sem hugsar það. Margir af núverandi þingmönnum munu hætta í næstu kosningum.“brjann@frettabladid.is