Færri feður í orlof eftir efnahagshrun

Mun færri feður nýta sér fæðingarorlof eftir efnahagshrunið en áður. Á síðustu þremur árum hefur hámark á fæðingarorlofsgreiðslum verið lækkað í þrígang og er hámarkið nú 300 þúsund krónur. Orlofsgreiðslum til feðra hefur fækkað um níu prósent frá árinu 2008, en greiðslum til mæðra fjölgað um 4,5 prósent.

Um helmingur feðra lenda í hámarkinu á móti 20 prósent mæðra. Þetta kemur fram í nýrri skýrslu, Konur í kreppu?, sem er samantekt á opinberum tölulegum gögnum á áhrifum efnahagshrunsins á velferð kvenna. Þær Eygló Árnadóttir og Eva Björnsdóttir tóku skýrsluna saman fyrir hönd velferðarvaktarinnar, stýrihóps sem skipaður var af ráðuneytinu til að fylgjast með félagslegum og fjárhagslegum afleiðingum efnahagsástandsins fyrir fjölskyldur og einstaklinga í landinu.

„Skoða þyrfti kynjamun á þeim hópi foreldra sem þurfa að brúa bilið milli fæðingarorlofs og leikskóla og detta á meðan út af vinnumarkaði með tilheyrandi tekjutapi. Telja má að þarna séu konur í miklum meirihluta," segir í skýrslunni. Tekjutap fjölskyldna er líklegra til að verða meira ef faðir fer í fæðingarorlof heldur en móðir. Viðhorf til feðra í orlofum eru einnig ólík innan vinnustaða, en í rannsókn á vegum Rannsóknastofu í kvenna- og kynjafræðum og fleiri frá árinu 2004 töldu 46 prósent atvinnurekenda að erfitt væri fyrir karlmann að taka þriggja mánaða fæðingarorlof, en 26 prósent að erfitt væri fyrir konu að taka sex mánaða orlof.

Kynjahlutfall atvinnulausra hér á landi hefur nú jafnast mun meira út heldur en var stuttu eftir efnahagshrunið. Niðurskurður hjá hinu opinbera hefur meiri áhrif á atvinnustöðu kvenna en karla þar sem konur eru yfirgnæfandi meirihluti ríkisstarfsmanna og þá sérstaklega í umönnunarkerfinu; 82 prósent af heilbrigðisstarfsfólki eru konur og 78 prósent grunnskólakennara.

Í umsögn Kennarasambands Íslands til menntaráðs Reykjavíkur um tillögur að sameiningu leik- og grunnskóla í Reykjavík segir að breytingarnar hafi í för með sér að 60 leikskólastjórnendum og 13 grunnskólastjórnendum verði sagt upp störfum. Þar af eru konurnar 70 og karlarnir 3.

sunna@frettabladid.is