Díoxín enn tugfalt yfir mörkum á Klaustri

Mæling díoxíns í útblæstri frá sorporkustöðinni á Kirkjubæjarklaustri var 58-falt yfir viðmiðunarmörkum í mælingu sem var gerð í janúar. Í mælingu árið 2007 var magn díoxíns 95-falt yfir mörkum. Mengun frá sorpbrennslunni á Svínafelli í Öræfum var mæld í fyrsta skipti á sama tíma og reyndist díoxín vera 287-falt yfir mörkum. Bæjarráð sveitarfélagsins Hornafjarðar ákvað í lok febrúar að loka stöðinni. Mælinga er að vænta frá Vestmannaeyjum.

Stöðin á Kirkjubæjarklaustri er einnig yfir mörkum hvað varðar lífræn efnasambönd en innan skekkjumarka hvað varðar kolmónoxíð. Sorporkustöðin í Svínafelli var yfir mörkum hvað varðar saltsýru, kolmónoxíð og lífræn efnasambönd. Umhverfisstofnun mun á næstu dögum ákveða hvernig brugðist verður við þessum niðurstöðum.

Niðurstöður mælinganna á Kirkjubæjarklaustri hafa verið sendar til allra íbúa Skaftárhrepps, með bréfi frá sveitarstjórn. Í því kemur fram að „starfsleyfi stöðvarinnar er í gildi til desember 2012 og vill sveitarstjórn fá álit sérfræðinga svo sem sóttvarnarlæknis og umhverfisyfirvalda um viðbrögð þeirra við niðurstöðunum, til að geta tekið upplýsta ákvörðun um framhald brennslunnar. Verði ljóst að heilsu manna sé hætta búin af völdum brennslunnar mun sveitarstjórn endurskoða rekstur stöðvarinnar.“ - shá