Lífið

Oprah með íslenska hönnun um sig miðja

Unnur við sjóinn. Mynd/Emily Sandifer
Unnur við sjóinn. Mynd/Emily Sandifer
Unnur Friðriksdóttir hönnuður gerir það gott í Los Angeles þar sem hún rekur fyrirtækið UNNURWEAR. Ýmsar stjórstjörnur eru í hópi viðskiptavina Unnar og nýverið bættist sjálf spjallþáttadrottningin Oprah Winfrey við.

„Þetta kom skemmtilega á óvart, svo ekki sé meira sagt, enda rosalegur heiður og ánægjuleg byrjun á nýju ári," segir hönnuðurinn Unnur Friðriksdóttir, sem nýlega fékk það hlutskipti að hanna og framleiða belti fyrir bandarísku spjallþáttadrottninguna Opruh Winfrey.

Unnur er búsett í Bandaríkjunum og rekur í Los Angeles hönnunarfyrirtækið UNNURWEAR, þar sem hún hannar undir eigin merki, UNNUR, og sérhæfir sig í gerð taskna, fylgihluta og fatnaðar fyrir konur og karla.

Í árslok 2010 setti hún ljósmyndir af nýrri línu belta eftir sig á Facebook og í kjölfarið hafði Jasmine H. Chang, yfirtískuritstjóri tímarits Opruh, O-Magazine, samband og óskaði eftir að hún hannaði eintök fyrir Opruh sjálfa og í tískuþætti í tímaritinu.

Belti Unnar í tímaritinu O.
„Ég hugsaði mig ekki tvisvar um, fékk mál Opruh send og hannaði í snatri umbeðinn fjölda belta, enda ekki á hverjum degi sem maður fær svona beiðni. Sendingin komst til Opruh rétt fyrir jól svo ég bjóst ekki við að heyra neitt fyrr en í fyrsta lagi eftir 3-6 mánuði því stór tímarit vinna langt fram í tímann.

Í janúar fékk ég hins vegar tölvupóst þar sem tilkynnt var að fyrsta beltið hefði verið myndað fyrir mars-tölublaðið. Það er samt aldrei staðfest fyrr en á síðustu stundu enda meira myndað en kemst inn í hverju sinni. Ég varð því glöð þegar ég fletti í gegnum blaðið í vikunni og sá myndina."

„Ekki ennþá, en hún er samt komin töluvert nær mér eftir að hún flutti nýju sjónvarpsstöðina sína til LA," segir Unnur hlæjandi, spurð hvort hún hafi hitt Opruh Winfrey sjálfa.

Oprah er þó ekki eina stjarnan sem hefur sýnt hönnun Unnar áhuga, því söngkonan Fergie á tösku eftir hana.

„Hún komst yfir eintak í gegnum stílistann sinn, vin minn og lét mig vita að henni fyndist taskan geðveik!"

Söngvarinn Bryan Adams á líka belti eftir Unni. „Ég kynntist honum þegar ég var rétt flutt til LA. Hann hefur verið hvetjandi, gefið mér góða krítík á ljósmyndirnar mínar síðustu ár og ég lít upp til hans."

Unnur er annars að leggja lokahönd á nýja línu og ætlar að vera í sambandi við starfsfólk Opruh þegar hún er til. „Þau verða án efa með þeim fyrstu sem fá sendar myndir, á eftir spenntri fjölskyldunni og nánum vinum sem eru helsta stuðningsliðið mitt."

roald@frettabladid.is






Fleiri fréttir

Sjá meira


×


Tarot dagsins

Dragðu spil og sjáðu hvaða spádóm það geymir.