Sex mánaða fangelsi fyrir að henda diski í konu

Karlmaður hefur verið dæmdur í sex mánaða fangelsi fyrir að henda postulínsdiski í andlit á sambýliskonu sinnar. Diskurinn brotnaði og konan hlaut opið sár í andliti. Þetta gerðist síðastliðið sumar.

Konan sagðist hafa fengið disk með mat hjá móður sinni, sem býr í nágrenni hennar, og komið með hann inn í íbúð mannsins, en þau hafi búið saman á þessum tíma.  Hún kveðst hafa borðað en síðan reynt að fá ákærða til að fara að sofa, en hann hafi verið mjög ölvaður.  Allt í einu hafi hann þrifið diskinn og kastað honum í sig. Maðurinn var yfirheyrður nokkrum dögum síðar og kvaðst hann ekki muna eftir þessu atviki en rengdi ekki frásögn konunnar.

Maðurinn á að baki brotaferil sem nær allt til ársins 1988.