Nýtt nýra breytti öllu

Það breytti öllu að fá nýtt nýra segir kona sem hefur tvisvar farið í nýrnaígræðslu. Í fyrra skiptið var hún aðeins fimmtán ára og hafði þá verið veik í nokkur ár. Hún hvetur fólk til að gerast líffæragjafar þar sem svo margir þarfnist líffæra.

Við sögðum frá því í fréttum okkar í gær að sautján Íslendingar hafa gengist undir nýrnaígræðslu í ár sem er metfjöldi. Síðastliðinn áratug hafa að jafnaði aðeins verið gerðar tíu til ellefu slíkar aðgerðir verið gerðar á ári.

Dilja Ólafsdóttir fór í sína fyrstu nýrnaígræðslu árið 1986 þegar hún var fimmtán ára. Hún hafði þá verið mikið veik í nokkur ár vegna fæðingargalla og meðal annars lítið getað sinn námi.

„Ég var stanslaust veik. Ég bjó nú í Vestmannaeyjum. Þannig að ég þurfti að fljúga á milli þrisvar í viku. Það fylgdi því mikil ógleði og rosaleg þreyta alltaf þannig að ég var eiginlega alla daga minnt á að ég væri mjög veik. Það breyttist þegar að ég fékk nýtt nýra. Ég fékk matarlyst og mátti borða hvað sem var. Ég gat stundað nám og tekið þátt í öllu sem mig langaði,“ segir Diljá.

Diljá segir aðgerðina hafa haft mikil áhrif á líf sitt og breytt öllu. Næstu ár gat hún lifað frekar eðlilegu lífi. Ígrædd nýru endast aðeins í takmarkaðann tíma og því getur fólk þurft að fara í gegnum nokkrar ígræðslur á ævinni. Árið 2004 tók Diljá að veikjast aftur en líkami hennar var þá farinn að hafna nýranu. Hún fór því aftur í nýrnaígræðslu árið 2009.

Diljá segir líffæragjafa mjög mikilvæga. „Það er náttúrulega rosalega mikilvægt fyrir þá sem þurfa líffæri og það er náttúrulega í dag orðin mjög mikil þörf fyrir það.“

Samkvæmt lögum er gert ráð fyrir því að fólk vilji ekki gefa líffæri sín við andlát nema að hafa tekið það fram áður. Þetta er nokkuð ólíkt því sem gerist hjá flestum nágrannaþjóðum okkar þar sem allir eru líffæragjafar nema þeir hafi tekið annað sérstaklega fram.

Diljá vill að íslenskum lögum verði breytt á þann hátt og telur að slíkt myndi hjálpa mikið.

„Þeir sem vilja ekki láta bara vita af því. Ég hvet fólk eindregið að gefa úr sér líffæri ef það er á annað borð ekki að nota þau. Það eru svo margir sem þarfnast þeirra.“