Domenech: Leikmennirnir voru eins og frekir krakkar

Raymond Domenech, fyrrum landsliðsþjálfari Frakka, hefur tjáð sig um hneykslismálin sem skóku franska landsliðið á HM í Suður-Afríku síðastliðið sumar.

Frakkar fóru heim með skottið á milli lappanna eftir að hafa fallið úr leik í riðlakeppninni. Leikmenn gerðu uppreisn á meðan keppninni stóð og Nicolas Anelka var sendur heim fyrir að hnakkrífast við Domenech.

Málið þótti mikið hneyksli í Frakklandi og fóru fjölmiðlar og margir stjórnmálamenn mikinn í gagnrýnni sinni á liðið, þjálfarann og leikmenn.

„Við vorum athlægi heimsbyggðarinnar," sagði Domenech við franska fjölmiðla. „Þegar ég lít til baka finnst mér að leikmennirnir hafa hagað sér eins og frekir krakkar."

Domenech segir að það sé ekki við hann að sakast í málinu.

„Ég vil að hið sanna komi fram í málinu. Ég er ekki sá fábjáni sem allir halda að ég sé."

„Ég gerði mistök, vissulega. Ég hlýt að hafa valið ranga leikmenn eða ekki fundið réttu orðin."

„En ég sætti mig ekki við gagnrýni stjórnmálamanna, né heldur frá fyrrum leikmönnum sem starfa nú í fjölmiðlum. Það kemur ekki í veg fyrir að ég get dregið mínar eigin ályktanir á þessu máli."