Svæfingalæknir í fangelsi fyrir fjársvik

Fimmtíu og fimm ára gamall svæfingalæknir var dæmdur í 12 mánaða fangelsi í Héraðsdómi Reykjavíkur í dag fyrir að svíkja rúmlega fjóra og hálfa milljón króna út úr Tryggingastofnun.

Svæfingalæknirinn var kærður árið 2007 en brot hans áttu sér stað á árunum 2004 til 2005. Við skoðun sjúkraskráa frá þessum árum kom í ljós að svæfingalæknrinn hafi krafið Tryggingastofnun og sjúklinga um greiðslu fyrir vinnu í mun lengri tíma en sjúkraskrár sögðu til um. Alls framvísaði hann 265 röngum reikningum við Tryggingastofnun á tveggja ára tímabili.

Maðurinn vann sem svæfingalæknir hjá barnatannlækni. Vann hann helst við að svæfa börn og fatlaða einstaklinga.

Svæfingarlæknirinn lýsti störfum sínum fyrir barnatannlæknin og sagði að nokkur undirbúningur væri nauðsynlegur fyrir aðgerðir, svo sem með því að ræða við foreldra og útvega lyf. Eftir aðgerðina væri haft eftirlit með sjúklingi á meðan hann væri að vakna. Yfirleitt væri fylgst með sjúklingi í um 2 klukkustundir eftir aðgerð, en stundum lengur. Sagðist svæfingalæknirinn oft fara að huga að undirbúningi svæfingar næsta sjúklings á meðan á því eftirliti stæði. Því gæti vel verið að hann hafi innheimt gjald fyrir vinnu við fleiri en einn sjúkling á sama tíma.

Dómari telur gögn málsins bera með sér að aðrir svæfingalæknar hafi ekki beitt gjaldskránni með þeim hætti sem maðurinn sagðist hafa gert.

Í dómsorði segir að brot svæfingalæknisins sé sérlega ófyrirleitið. Var hann því dæmdur í 12 mánaða fangelsi, þar af eru níu mánuðir skilorðsbundnir. Það þýðir að læknirinn þarf að afplána þriggja mánaða fangelsisvist. Honum er einnig gert að endurgreiða Tryggingastofnun hið stolna fé. Maðurinn er búsettur í Svíþjóð.