Vilja kjarasamninga klára í lok vikunnar

„Við stefnum að því að ljúka gerð kjarasamninga í næstu viku. Þess vegna er orðið mjög brýnt að það fari að sjást í ákvarðanir frá stjórnvöldum,“ segir Gylfi Arnbjörnsson, forseti Alþýðusambands Íslands.

Vilhjálmur Egilsson, framkvæmdastjóri Samtaka atvinnulífsins, tekur undir með Gylfa hvað snertir aðkomu stjórnvalda. Báðir nefna þeir þar fyrst aðgerðir og fjárfestingar í atvinnumálum. Einnig breytingar á lífeyrissjóðakerfi opinberra starfsmanna. „Tryggingafræðilegur halli á lífeyrissjóðum opinberra starfsmanna var um fimm hundruð milljarðar króna í árslok 2009. Og þetta gat er alltaf að stækka. Við viljum sjá því lokað,“ segir Vilhjálmur.

SA hefur boðið launahækkun upp á 7 til 8 prósent á þremur árum. „Við höfum algerlega hafnað því. Að sama skapi er alveg ljóst að svigrúmið til mikilla breytinga er þröngt,“ segir Gylfi. „Atvinnurekendur hafa viljað fá meiri vissu fyrir auknum framkvæmdum og umsvifum í hagkerfinu. Eina leiðin sem þeir hafa til að borga reikninginn er að auka umsvifin.“

Spurður um launahækkanir segir Vilhjálmur ekki standa til að gera verðbólgusamninga. „Eftir því sem tölurnar eru lægri, þess líklegra er að við séum að tala um kaupmáttaraukningu,“ segir hann.

Samkomulag er um að launahækkanir sem um semst gildi afturvirkt frá 1. mars. Gylfi segir að greidd verði eingreiðsla sem nemi launahækkuninni fyrir mars, apríl og maí. „Samningurinn öðlast ekki gildi fyrr en um miðjan júní og þá að undangengnu því að Alþingi og stjórnvöld séu búin að efna það sem að þeim snýr. Það hefur verið ljóst að erfiðasti hjalli þessara viðræðna væri með hvaða hætti aðkoma stjórnvalda yrði,“ segir hann.

Vilhjálmur segir að nú verði hert á vinnunni. „Markmiðið núna er að klára þetta fyrir næstu helgi. Sumt er að ganga, annað gengur hægar og sumt hreyfist ekki,“ segir hann.

Af hálfu SA hefur verið sett fram krafa fyrir gerð kjarasamnings að samtökin fái aðkomu að gerð væntanlegs frumvarps um breytingar á lögum um stjórn fiskveiða. Gylfi segir sjómenn og landverkafólk innan ASÍ einnig gera kröfu um að fá að koma að mótun sjávarútvegsstefnunnar þótt SA og ASÍ séu sammála um fátt í þessum efnum.

„Þessi mál eru ekki að hreyfast og við getum ekki unað því,“ segir Vilhjálmur, sem játar því að strandað geti á fiskveiðistjórnunarmálinu. „Það er alveg eins líklegt,“ svarar framkvæmdastjóri SA. gar@frettabladid.is