Frosti á X-inu: Ég veit það manna best að þetta var ekki sviðsett

„Ég er líklega sá sem veit það manna best að þetta var ekki sviðsett því það var ég sem boðaði þá í þáttinn. Þeir höfðu ekkert samráð sín á milli," segir Frosti Logason, útvarpsmaður í þættinum Harmageddon á X-inu 977.

Lögreglan telur að árás rapparans Móra á Erp Eyvindarson í höfuðstöðvum X-ins í Skaftahlíðinni á síðasta ári hafi verið sviðsett en meðal annars kom hnífur og rafbyssa við sögu. Erpur kærði árásina til lögreglu en eftir stuttlega rannsókn var málið látið niður falla á þeim forsendum að lögreglan taldi árásina vera sviðsetta.

Lögmaður Erps var ekki sáttur við þá niðurstöðu og kærði hana til ríkissaksóknara sem er ósammála þeim rökum og vill frekari rannsókn.

Frosti furðar sig á vinnubrögðum lögreglunnar í málinu. „Ég er mjög hissa, það er fáránlegt að leyfa sér að fullyrða þetta," segir hann en tekin var skýrsla af honum eftir atvikið. „Lögreglan talaði við mig og ég fór og gaf skýrslu og allt. En eftir á að hyggja, þegar ég sé þetta núna frá þeim, þá fannst mér lögreglumaðurinn sem tók af mér skýrsluna taka frekar léttúðlega á þessu og slá á létta strengi. Þetta var alveg fáránlegt frá upphafi til enda," segir hann en á meðal þess sem ríkissaksóknari fer fram á er að teknar verði ítarlegri skýrslur af Erpi og vitnum í málinu, þar á meðal Frosta.

„Þetta er alvarlegt mál. Ef fólk lendir í hnífaárásum á það þá von á því að lögreglan leyfi sér að alhæfa eitthvað svona bull? Hún tekur greinilega ekki mark á þeim vitnum sem hún talaði við. Þetta er bara út í hött," segir hann og bendir á að það sé fyrir öllu að enginn slasaðist í árásinni. „Á meðan þessu stóð var þetta þvílíkt ástand og þetta er háalvarlegt," segir hann að lokum.

Nánar verður rætt um málið í þættinum hjá þeim á morgun sem hefst klukkan 15 á X-inu 977.