Óvissa um stuðning fimm þingmanna Sjálfstæðisflokks

Óvissa er um stuðning a.m.k fimm þingmanna Sjálfstæðisflokksins við nýja Icesave-samninginn og því skiptist þingflokkurinn í tvær fylkingar í afstöðu til hans en öll forysta flokksins styður nýjan samning. Tuttugu og níu félagsmenn hafa skráð sig úr Sjálfstæðisflokknum frá því í gær.

Bjarni Benediktsson, formaður Sjálfstæðisflokksins, lýsti í gær yfir stuðningi við nýjan Icesave-samning, hinn þriðja í röðinni en áður höfðu þrír nefndarmenn flokksins í fjárlaganefnd gefið út álit um stuðning við samninginn. Bjarni hafði áður lýst því yfir, sem formaður utanríkismálanefndar þingsins í desember 2008 að fara ætti samningaleiðina í Icesave-málinu. Þá átti stjórnarandstaðan jafnframt tvær tilnefningar í nýju Icesave-nefndina undir forystu Lee Buchheits, en Lárus Blöndal var fulltrúi stjórnarandstöðunnar í nefndinni og var formennska Buchheits samkomulagsatriði. Stjórnarandstaðan, og þá sérstaklega sjálfstæðismenn, höfðu mælt sérstaklega með honum. Forysta Sjálfstæðisflokksins mat það svo, með hliðsjón af nýjum samningi og þeirri áhættu sem fylgdi því að tapa dómsmáli gegn ESA, eftirlitsnefnd EFTA, fyrir EFTA-dómstólnum að hagsmunum Íslands væri best borgið að ganga frá málinu núna með samningum.

Öll forysta flokksins með formanninum í málinu

Eftir því sem fréttastofa kemst næst styður öll forysta Sjálfstæðisflokksins formanninn í málinu, en þar má nefna Ólöfu Nordal, varaformann flokksins, Ragnheiði Elínu Árnadóttur, formann þingflokksins og Einar K. Guðfinnsson, varaformann þingflokksins. Flestir aðrir eru jafnframt sagðir styðja forystuna að málum. Óvissa er hins vegar um stuðning a.m.k fimm þingmanna af þeim sextán sem skipa þingflokk Sjálfstæðisflokksins. Birgir Ármannsson, Sigurður Kári Kristjánsson, Pétur Blöndal, Unnur Brá Konráðsdóttir og Guðlaugur Þór Þórðarson gefa ekki upp afstöðu sína. Birgir Ármannsson, segist ekki vera sammála meirihluta þingflokksins. „Það liggur alveg fyrir að ég er ekki samstíga meirihluta þingflokksins eins og hún birtist í niðurstöðunni út úr fjárlaganefnd. Afstaða mín að öðru leyti mun birtast í þinginu," segir Birgir. Hann segir ljóst að óánægja sé meðal margra sjálfstæðismanna. „Ég held að það leiki enginn vafi á því að það eru skiptar skoðanir innan flokksins um þetta mál."

Vilja kanna umboð formannsins

Mikil óánægja er meðal ungra sjálfstæðismanna, en bæði Heimdallur, félag ungra sjálfstæðismanna í Reykjavík og Samband ungra sjálfstæðismanna sendu frá sér ályktanir um málið í gær en í ályktun Sus segir að tillaga fulltrúa Sjálfstæðisflokksins í fjárlaganefnd séu „fullkomin svik við þá stefnu Sjálfstæðisflokksins sem samþykkt var á landsfundi 2010 um að hafna beri löglausum kröfum Breta og Hollendinga í Icesave málinu," eins og það er orðað. Í ályktun Heimdallar segir að halda þurfi landsfund sem fyrst til að kanna umboð formannsins. Þá sköpuðust fjörugar umræður á síðu formanns flokksins á Facebook og þegar fréttin var skrifuð höfðu 117 athugasemdir verið skrifaðar við færslu hans þar sem hann lýsti yfir stuðningi við samninginn, en flestir lýsa yfir óánægju með þá afstöðu hans. Samkvæmt upplýsingum frá skrifstofu flokksins í Valhöll höfðu tuttugu og níu félagsmenn skráð sig úr flokknum núna laust fyrir hádegið, en á sjötta tug þúsunda manna eru skráðir í Sjálfstæðisflokkinn. thorbjorn@stod2.is