Hvetur til umræðu um innflytjendamál

Árni Johnsen, þingmaður Sjálfstæðisflokksins, hvetur til þess að útlendingum sem hingað komi sé veitt meira svigrúm. Hann ætlar samt ekki að beita sér sérstaklega í máli Jussanam da Silva sem missti dvalarleyfið sitt og atvinnuleyfi eftir að hún skildi við íslenskan eiginmann sinn.

Árni Johnsen lagði hins vegar fram frumvarp á dögunum ásamt Sigmundi Erni Rúnarssyni, þingmanni Samfylkingarinnar, um að rússneski rithöfundurinn Madina Salamova, betur þekkt sem Marie Amelie fengi íslenskan ríkisborgararétt eftir að henni var vísað frá Noregi, þar sem hún hefur búið frá barnsaldri. Jussanam sagði við Vísi í kvöld að hún skyldi ekki að íslenskir þingmenn vildu taka upp málstað rússnesku konunnar en ekki sinn.

Árni Johnsen segir að tillagan um ríkisborgararéttinn fyrir Amelie hefði verið til að vekja athygli á því hvað reglur um innflytjendur væru þröngar. „Við bara skelltum þessu fram og það vakti mikla athygli. Og mér finnst bara mikilvægt að vekja á þessu athygli," segir Árni. Hér á landi séu einnig mál sem krefjist mikillar umræðu og mál Jussanam da Silva sé eitt þeirra.

Árni segir mikilvægt að taka tillit til fólks sem sé búið að dvelja í landinu í langan tíma, vera gift hér og tali íslensku vel. „Þá finnst mér þetta fólk hafa áunnið sér allmikinn rétt," segir Árni. Hann segir að Íslendingar þurfi að veita útlendingum sem hingað vilja koma meira svigrúm því Íslendingar sem dvelji erlendis vilji sannarlega að þeim sé veitt svigrúm.