Voru drukknir og mættu of seint á hótelið

Fimm leikmenn hafa verið reknir úr landsliði Síle fyrir að mæta bæði drukknir og of seint á hótel landsliðsins sem undirbýr sig nú fyrir leiki í undankeppni HM 2014.

Landsliðsþjálfarinn Claudio Borghi ákvað að gefa leikmönnum frí eftir morgunæfingu á þriðjudaginn. Þeir áttu hins vegar að skila sér aftur upp á hótel eigi síður en klukkan 22 um kvöldið.

„Fimm leikmenn mættu 45 mínútum of seint og ekki í ástandi sem sæmir atvinnumanni í knattspyrnu,“ sagði þjálfarinn. „Ég tók því þá ákvörðun að setja þá út úr hópnum.“

Leikmennirnir sem um ræðir eru Jorge Valdivia, Jean Beausejour, Carlos Carmona, Gonzalo Jara og Arturo Vidal.

Síle mætir Úrúgvæ á morgun og svo liði Paragvæ á þriðjudaginn kemur.