Ungir skákunnendur heiðraðir fyrir söfnunarstarf

Rauði kross Íslands heiðraði í morgun ungmennin sem stóðu fyrir skákhátíðinni „Við erum ein fjölskylda" um síðustu helgi, en þau söfnuðu alls einni milljón króna í tveggja daga skákmaraþoni sem þau héldu til styrktar Sómalíu.

Á sama tíma tók símasöfnun Rauða Krossins einnig mikinn kipp og bættist þar við um ein milljón króna að auki. Um 20 börn tóku þátt í maraþoninu og segir í fréttatilkynningu frá Rauða krossinum að samtökin séu þeim ákaflega þakklát fyrir framtakið.

Fulltrúar Rauða Krossins litu í þakkarskyni inn á æfingu hjá Skákakademíunni í morgun þar sem hinir öflugu skákkrakkar tóku á mótu viðurkenningarskjölum, en peningarnir sem safnað var verða notaðir til hjálparstarfs í Sómalíu þar sem talið er að um 1.2 milljónir barna þarfnist neyðaraðstoðar.

Upphæðin sem safnaðist dugar til að kaupa bætiefnaríkt hnetusmjör til að hjúkra um 1.300 alvarlega vannærðum börnum til heilbrigðis.

Það voru Skákakademía Reykjavíkur og Skáksamband Íslands sem stóðu fyrir maraþonskákhátíðinni í Ráðhúsi Reykjavíkur. Þar tefldu mörg efnilegustu börn og unglingar landsins við gesti og gangandi, en mótherjar krakkanna borguðu upphæð að eigin vali.

Áfram verður tekið á móti framlögum í síma Rauða krossins, 904-1500, og þá bætast við 1.500 kr. við næsta símreikning. Einnig er hægt að styrkja neyðaraðstoð Rauða krossins í Sómalíu með því að greiða inn á reikning hjálparsjóðs í banka 0342, hb. 26, reikn. 12, kt. 530269-2649. Þá munu öll áheit fyrir Rauða krossinn í Reykjavíkurmaraþoninu þann 20. ágúst renna í Sómalíusöfnunina.

Á næstu vikum og mánuðum munu Rauði krossinn og Rauði hálfmáninn veita um 50.000 börnum aðstoð á næringarmiðstöðvum hreyfingarinnar, og dreifa matvælum til um einnar milljónar manna.