Írar nánast öruggir á EM - tvö rauð hjá Eistlandi

Írland er vægast sagt í sterkri stöðu í sinni umspilsrimmu gegn Eistlandi eftir 4-0 sigur á útivelli í kvöld. Leikurinn var hreinasta martröð fyrir heimamenn sem misstu tvo leikmenn af velli með rautt spjald.

Það er ljóst að Írar eru nánast öruggir með sæti sitt í úrslitakeppninni í Póllandi og Úkraínu á næsta ári eftir glæsilegan sigur í kvöld. Eistlendingar börðust hetjulega en voru sjálfum sér verstir.

Keith Andrews og Jon Walters skoruðu fyrstu tvö mörk Íra og svo Robbie Keane hin tvö, það síðara úr vítaspyrnu.

Írarnir byrjuðu leikinn af miklum krafti í kvöld og uppskáru mark strax á þrettándu mínútu. Andrews skoraði með skalla eftir laglega fyrirgjöf Aiden McGeady.

Eistlendingar voru þó að reyna sitt besta og uppskáru nokkur færi í fyrri hálfleik. Shay Given, markvörður Íra, var þó vel á verði í nokkur skipti.

Staða heimamanna versnaði þó til muna eftir að Andrei Stepanov fékk að líta rauða spjaldið fyrir sína aðra áminningu strax á 35. mínútu. Síðara gula spjaldið fékk hann fyrir að brjóta á Keane sem var að sleppa í gegn.

Eistlendingar héldu samt áfram að berjast fyrir sínu í upphhafi síðari hálfleiks en án árangurs þó. Vonir þeirra slökknuðu þó þegar að Írar skoruðu tvívegis um miðbik hálfleiksins með stuttu millibili.

Jon Walters, leikmaður Stoke, skoraði á 67. mínútu sitt fyrsta landsliðsmark á ferilnum er hann skoraði með skalla eftir fyrirgjöf Keane. Sá síðarnefndi skoraði svo sjálfur fjórum mínútum síðar er hann fylgdi eftir skoti Andrews sem var varið.

Aðeins fimm mínútum síðar kom seinna rauða spjaldið hjá heimamönnum og aftur fyrir að brjóta á Keane þegar hann var að sleppa í gegn. Í þetta sinn var sökudólgurinn Raoi Piiroja.

Fjórða markið kom svo úr vítaspyrnu eftir að varnarmaður Eistlands braut á Stephen Hunt. Keane tók spyrnuna og skoraði sitt annað mark í leiknum.