Reykvíkingur ársins kynntur til leiks við opnun Elliðaánna

Jón Gnarr, borgarstjóri, verður viðstaddur opnun Elliðaánna í fyrramálið klukkan 7 í boði Stangaveiðifélags Reykjavíkur sem hefur umsjón með ánum. Í ár verður hins vegar bryddað upp á þeirri nýbreytni að borgarstjóri mun ekki veiða lax í ánum. Þess í stað mun fulltrúi almennings í Reykjavík renna fyrir lax í stað borgarstjóra.

Jón stóð nýverið fyrir leit að Reykvíkingi ársins og var almenningur hvattur til þess að koma með ábendingar um fólk sem þætti til fyrirmyndar og hefði lagt borginni gott til á einhvern hátt með ólaunuðu framlagi sínu. Fjölmargar ábendingar bárust og hefur Reykvíkingur ársins nú verið valinn af þriggja manna dómnefnd og mun hann opna Elliðaárnar 2011 um leið og tilkynnt verður hver Reykvíkingur ársins 2011 er.