Annar flutningabíll fauk út af

Flutningabíll fauk út af Ólafsfjarðarvegi nærri Dalvík í morgun og skemmdist talsvert samkvæmt lögreglunni á Akureyri. Ökumaðurinn var fluttur á Heilsugæsluna á Dalvík en hann er ekki alvarlega slasaður.

Ökumaðurinn var ekki með farm í bílnum þegar hann ók veginn en svo virðist sem vindurinn hafi einfaldlega feykt honum út af veginum í snarpri hviðunni, en vindurinn var afar sterkur í morgun. Veðrið hefur gengið lítillega niður en samkvæmt upplýsingum frá lögreglunni eru enn sterkir vindar þó svo veðrið sé ekki jafn slæmt og í morgun.

Þá fauk vöruflutningabíll á hliðina á Borgarfjarðarbrú við Borgarfjörð um áttaleytið í morgun. Ökumaður var einn í bílnum, en slapp ómeiddur.