Elva Dögg fær loksins að fara í aðgerð vegna Tourette

Elva Dögg Gunnarsdóttir, sem er illa haldin af Tourette-heilkenni, hefur fengið þau skilaboð frá lækni sínum að hún komist í aðgerð í apríl, að öllum líkindum fyrir páska. „Ég er voðalega ánægð en ég er samt skeptísk á þetta. Ég er hrædd við að þetta sé ekki raunverulegt," segir Elva Dögg. Hún tekur fréttunum með ákveðnum fyrirvara og segir það bestu leiðina til að brynja sig fyrir mögulegum vonbrigðum ef hlutirnir ganga ekki eftir eins og búist er við. „Ég þori ekki alveg að treysta á þetta," segir hún.

Ættingjar Elvu Daggar setja ekki jafn mikla fyrirvara við aðgerðina og hún sjálf. „Þau sýna miklu meiri tilfinningar en ég. Þau eru rosalega glöð," segir Elva Dögg.

Tourette-heilkennið hefur gríðarleg áhrif á allt daglegt líf Elvu Daggar og hún hefur lengi reynt að komast í aðgerð en án árangurs. Í liðinni viku var ítarleg umfjöllun um Elvu Dögg í Kastljósi Ríkissjónvarpsins sem vakti mikla athygli.

Spurð um ástæðu þess að hún fær vilyrði fyrir aðgerð einmitt nú segist Elva Dögg hreinlega ekki vita það. „Þeir sögðu að þetta hefði alltaf verið uppi á borðinu en aldrei komist alveg í gegn," segir hún.

Elva Dögg heldur sínu striki og bíður nú eftir aðgerðinni, með sínum fyrirvörum. „Ég held bara dampi," segir hún.