Sakar stjórnarþingmann um ósæmandi hagsmunagæslu

Ráðherra vegamála segir að ekki séu til fjármunir til að ráðast í jarðgöng á næstu árum og gagnrýnir þingmann Samfylkingarinnar fyrir ósæmandi hagsmunagæslu fyrir Norðfjarðargöng.

Jónína Rós Guðmundsdóttir, þingmaður Samfylkingarinnar í Norðausturkjördæmi, spurði Ögmund Jónasson innanríkisráðherra á Alþingi fyrir hádegi hversvegna Norðfjarðargöngum hefði verið frestað og hvaða jarðgöng hann teldi eðlilegast að farið yrði í næst.

Ögmundur sagði forsendur síðustu samgönguáætlunar hafa brostið vegna bankahruns. Hann teldi Norðfjarðargöng brýn í efnahagslegu tilliti og til að bæta samgöngur á Austfjörðum. Hins vegar þyrfti að horfa til öryggis fólks og þar væri grundvallaratriðið að fólk yfirleitt kæmist á milli svæða. Þar væru Vestfirðir langverst staddir. Þessvegna væri samkvæmt samgönguáætlun gert ráð fyrir að verja hlutfallslega mestu fjármagni til Vestfjarða.

Jónína Rós sagði að búið væri að lofa Norðfjarðargöngum í áratugi.

„Fjórðungssjúkrahúsið okkar er handan við handónýt jarðgöng. Konur frá Seyðifirði, þær þurfa að fara yfir tvo hæstu fjallvegi landsins til þess að fjölga sér," sagði Jónína.

Ögmundur sagði það engum góðum tilgangi þjóna að tala samgöngumannvirki niður með þessum hætti. Þeir þingmenn teldu sig þá vera að tala upp móralinn á þessum svæðum og þar með teldu þingmenn sig vera að standa sig afskaplega vel í hagsmunagæslu fyrir sína umbjóðendur.

„Mér finnst þetta ekki rétt nálgun. Mér finnst hún í rauninni ekkert sæmandi. Við erum ekki með þessa fjármuni til ráðstöfunar," sagði Ögmundur og bætti við:

„Sýnum fyrirhyggju og raunsæi og hættum að lofa upp í ermina á okkur."