Leit hjá stuðningsklúbbi Vítisengla

Lögreglan fann eftirlíkingu skotvopns við húsleit í Reykjanesbæ í fyrradag. Tveir karlmenn, annar á fertugsaldri en hinn tvítugur, voru handteknir í þágu rannsóknarinnar en skotvopnið fannst á heimili annars þeirra. Þessir tveir karlmenn tengjast báðir vélhjólaklúbbi í Reykjanesbæ, MC Suðurnes, sem er stuðningsklúbbur íslensku Vítisenglanna.

 

Húsleit var einnig framkvæmd í félagsheimili MC Suðurnesja í Reykjanesbæ í tengslum við þetta mál, þar sem meðal annars var lagt hald á barefli, hafnaboltakylfur og fleira í þeim dúr, og peningaskáp. Lögregla opnaði peningaskápinn í gær og rannsakaði innihald hans, en þar reyndist ekkert saknæmt á ferðinni.

 

Upphaf þessa máls má rekja til þess að annar mannanna sást með hið ætlaða skotvopn í eftirlitsmyndavél í miðborg Reykjavíkur.

 

Að aðgerðinni stóðu lögregluliðin á höfuðborgarsvæðinu og Suðurnesjum auk lögreglumanna frá embætti ríkislögreglustjóra.