Pastore skoraði tvö og PSG á toppinn - Joe Cole með glæsimark

Argentínumaðurinn Javier Pastore skoraði tvö mörk í 3-0 sigri Paris Saint-Germain á Montpellier í frönsku deildinni í gær. Parísarliðið, sem var fremst í flokki Evrópufélaga á leikmannamarkaðinum í sumar, komst á topp deildarinnar með sigrinum.

Pastore hefur farið á kostum á sínu fyrsta tímabili í Frakklandi. Pressan sem fylgir því að vera dýrasti knattspyrnumaður Frakklands virðist ekki há honum. Pastore var keyptur til PSG frá Palermo á 42 milljónir evra í sumar.

Parísarliðið er á toppi frönsku deildarinnar með 17 stig eftir átta leiki. Lyon, sem lagði Bordeaux á heimavelli 3-1, er einnig með 17 stig en lakara markahlutfall.

Meistarar Lille gerðu sitt fjórða jafntefli í röð þegar Lorient kom í heimsókn. Lokatölurnar urðu 1-1 en bót í máli fyrir heimamenn að Joe Cole skoraði glæsilegt mark og opnaði markareikning sinn í frönsku deildinni. Markið má sjá hér.

Hann varð um leið fyrsti Englendingurinn til þess að skora í frönsku deildinni síðan hinn hárprúði Chris Waddle skoraði fyrir Marseille árið 1992.