Ronaldo ætlar að leggja skóna á hilluna í dag

Brasilískir fjölmiðlar greindu frá því í gærkvöldi að brasilíski framherjinn Ronaldo væri búinn að ákveða það að leggja knattspyrnuskóna á hilluna og myndi tilkynna það á blaðamannafundi í dag.

Ronaldo segir að þetta sé rétti tíminn til að setja punktinn á bak við 18 ára feril þar sem hann var meðal annars kostinn besti knattspyrnumaður heims þrisvar sinnum, varð heimeistari með Brasilíu 2002 og skoraði flest mörk allra í úrslitakeppni HM eða fimmtán.

„Ég get þetta ekki lengur. Ég vil halda áfram en ég get það bara ekki. Ég ætla mér kannski að framkvæma eitthvað í leik en líkaminn hlýðir ekki. Tími minn í fótboltanum er á enda," sagði Ronaldo í viðtali við Estado de Sao Paulo blaðið. Hann er 34 ára gamall en hefur verið mikið meiddur síðustu árin í boltanum.

Ronaldo hefur spilað undanfarin tvö ár með Corinthians í heimalandi sínu en hann lék síðast í Evrópu með ítalska liðinu AC Milan frá 2007 til 2008. Ronaldo skoraði alls 217 mörk í 298 deildarleikjum með PSV Eindhoven (1994-1996), Barcelona (1996-1997), Inter Milan (1997-2002), Real Madrid (2002-2007) og AC Milan (2007-2008).