Bjarni Ben vill að Alþingi endurskoði stjórnarskrána

Í yfirlýsingu frá Bjarna Benediktssyni, formanni Sjálfstæðisflokksins, hvetur hann til þess að Alþingi hefjist tafarlaust handa við endurskoðun stjórnarskrárinnar. Hann segir stjórnarskránna kveða á um að Alþingi eitt geti gert á henni breytingar og flokkurinn sé tilbúinn í umræður um auðlindaákvæði.

„Sjálfstæðisflokkurinn hvetur til þess að Alþingi hefjist nú þegar handa við endurskoðun stjórnarskrárinnar án frekari millileikja og kostnaðar fyrir almenning. Þar verði meðal annars rætt um auðlindaákvæði, þjóðaratkvæðagreiðslur, forsetaembættið, dómstólana og önnur atriði sem þarfnast skýringar og endurskoðunar," segir í yfirlýsingunni.

Bjarni segir að frá því ríkisstjórn Jóhönnu hafi tekið við völdum, fyrir tveimur árum upp á dag, hafi stjórnlagaþingið verið helsta baráttumál hennar. Umræðan hafi verið um formsatriði en ekki efnisleg atriði á Alþingi. Nú sé málið í uppnámi, eftir ákvörðun Hæstaréttar Íslands, og nánast aftur komið á byrjunarreit.

„Enn hefur enginn axlað pólitíska ábyrgð í málinu en forsætisráðherra hefur boðað til fundar í dag um samráð milli stjórnmálaflokkana um næstu skref," segir Bjarni.

Bjarni bendir á 79. gr. stjórnarskrárinnar þar sem kveður á um að Alþingi sjálft geti einungis breytt stjórnarskránni. „Hugmyndir um að Alþingi gefi þetta grundvallarhlutverk frá sér og skuldbindi sig til að hlíta tillögum til breytinga frá ráðgefandi þingi ganga því í berhögg við skýr ákvæði stjórnarskrárinnar. Ábyrgðin er hjá Alþingi og undir henni verður þingið að rísa."

„Staða málsins er því sú að ímynduð andstaða Sjálfstæðisflokksins við endurskoðun og umbætur er helsta réttlæting forsætisráðherra fyrir því að halda hugmyndinni um stjórnlagaþing til streitu."