Icelandairmálið afar sérstakt

„Þetta er afar sérstakt. Við getum alveg sagt það,“ segir Guðjón Arngrímsson, upplýsingafulltrúi Icelandair um mál konu sem hefur stefnt flugfélaginu.

Konan, sem er bandarísk, var í flugi Icelandair til Minneapolis sumarið 2006. Hún rak höfuðið í sjónvarpsskjá í farþegarýminu og segist hafa skaðast á höfði. Hún segir áhöfn flugvélarinnar bera ábyrgð á slysinu og stefndi því flugfélaginu.

Guðjón Arngrímsson segir alls ekki algengt að farþegar stefni flugfélaginu. „Án þess að ég geti tekið einhver dæmi, þá höfum við séð ýmislegt í gegnum tíðina. Við höfum verið í alþjóðaflugi áratugum saman og það hefur ýmislegt komið uppá. En þetta er óvenjulegt mál,“ segir Guðjón.