Eyjólfur Sverrisson nýr landsliðsþjálfari í Mýrarbolta

Stjórn Mýrarboltafélags Íslands hefur skrifað undir samning við Eyjólf Sverrisson um að hann þjálfi bæði landslið Íslands í mýrarbolta, karla og kvenna. Launakjör eða önnur ákvæði samningsins verða ekki gefin upp að svo stöddu.

„Þetta er ánægjulegt skref. Mig hefur í nokkurn tíma vantað þægilega aukavinnu sem borgar vel, og þetta djobb uppfyllir þær kröfur," segir Eyjólfur í fréttatilkynningu. „Ég man að einu sinni var ég á landbúnaðarsýningu í nágrenni við Stuttgart og þar sá ég fjögur ægileg svín takast á í stíu. Þar sýndist mér sá feitasti hafa ótvíræða yfirburði og því er líklegt að ég muni leggja á það ríka áherslu að landsliðsmennirnir borði kolvetna- og fituríka fæðu. Leikskipulag hefur líklega minni áhrif," bætir Eyjólfur við.

Eyjólfur furðar sig á að KSÍ hafi ekki tekið upp regluna um skítkast. „Nóg er nú drullumakið inná vellinum. Mér sýnist skítkastið vera eina ærlega leiðin til að veita fótboltadólgum ráðningu. Mér dettur til dæmis í hug að leikaraskapur, munnbrúk og rangt tekið innkast varði við skítkast."

„Stórum áfanga er náð. Eyjólfur er búinn að vera í drullumálum síðustu misseri, og samkvæmt þessum samningi verður hann það áfram," segir Jóhann Bæring Gunnarsson aðalritari Mýrarboltafélags Íslands og drullusokkur. „Eyjólfur er átrúnaðargoðið mitt."

„Ég er enn ósammála þessu vali, þessi Eymundur þarna er alltof dýr miðað við hvað hann hefur verið að sýna upp á síðkastið," segir Jón Páll Hreinsson gjaldkeri. „Jói verður að sýna mér hvaðan hann ætlar að fá þessa peninga eða ég hætti í stjórninni, það eru hreinar línur. Það er kominn tími til að hann taki niður innrammaða plaggatið sem hann á af Eyjólfi í Besiktas-treyjunni, hengi brúðkaupsmyndina sína aftur upp og fullorðnist."