Veigar Páll fær góðar kveðjur frá stuðningsmönnum Stabæk

Stuðningsmenn norska fótboltaliðsins Stabæk óska Veigari Páli Gunnarssyni velgengni á nýjum vinnustað fótboltamannsins í Þrándheimi. Veigar Páll hefur verið einn af vinsælustu leikmönnum Stabæk hjá stuðningsmönnum liðsins en hann er nú á förum til meistarliðs Rosenborg. 

Jonas Benkow talsmaður stuðningsmannafélags Stabæk segir að þeir sendi Veigari Páli góðar kveðjur: „Við óskum Veigari velgengni. Það er sorglegt að hann sé á förum en svona er fótboltinn. Að auki þarf Stabæk á fjármunum að halda og ég er viss um að þetta var ekki ákvörðun sem hann tók einn. Hann fær að sjálfsögðu einhverjar „pillur“ frá okkur þegar við leikum gegn Rosenborg,“ sagði Benkow við Aftenposten í Noregi.

Veigar er búinn að komast að samkomulagi um kaup og kjör hjá Rosenborg en félögin eiga eftir að  semja um kaupverðið á framherjanum.

Benkow bætir því við að frægðarsól sænska þjálfarans Jan Jönsson, sem er núverandi þjálfari Rosenborg, hafi fallið hratt hjá stuðningsmönnum Stabæk. Jönsson gerði Stabæk að norskum meisturum í fyrsta sinn í sögu félagsins haustið 2008.

„Jönsson er ekki í neinni draumastöðu, en hann er að taka leikmenn af sínu gamla liði og það verður til þess að álit okkar minnkar á honum,“ segir Benkow.

Veigar hefur skorað 7 mörk á tímabilinu og gefið 4 stoðsendingar.