Biðja skólameistara afsökunar á auglýsingum Office1

„Þetta var upphaflega hugsað sem innanhúshúmor á Akureyri. Við ætluðum ekki að gera lítið úr neinum," segir Erling Valur Ingason, markaðsstjóri Office 1 en auglýsingar birtust í blaðinu Dagskránni fyrir jól með myndum af Oddi Helga Halldórssyni, formanni bæjarráðs, Jóni Má Héðinssyni, skólameistara MA og Hjalta Jóni Sveinssyni, skólameistara VMA. Aftur á móti gaf enginn þeirra leyfi fyrir því að persónur þeirra yrðu notaðar með þessum hætti. Í auglýsingunn vari haft eftir þeim að þeir ætluðu að spara í ár.

Skólameisturunum er ekki skemmt en Jón Már sagði í viðtali við fréttastofuna N4 að hann væri að kanna hvaða lagalegu stöðu hann hefði við þessar kringumstæður.

„Það er alvarlegt að nota embættið með þessum hætti. Á meðan við könnum stöðuna munum við ekki eiga viðskipti við umrætt fyrirtæki," var haft eftir skólameistaranum.

Þess fyrir utan þá er birting myndanna klárt brot gagnvart siðareglum auglýsenda og varðar við 8. grein þeirrra reglan þar sem segir orðrétt: „Í auglýsingum skal ekki sýna eða minnast á einstaklinga, hvort sem þeir starfa á eigin eða opinberu sviði, nema áður fengin heimild sé fyrir hendi."

„Ég er persónulega búinn að tala við Hjalta [Jón Sveinsson, skólameistara VMA] og biðja hann afsökunar," sagði Erling Valur og bætir við að opinber afsökunarbeiðni muni birtast í sama blaði eftir viku. Upphaflega átti afsökunarbeiðnin að birtast í þessari viku að sögn Erlings, en ekki hafi verið rými til þess.

„Að sjálfsögðu biðjum við þá afsökunar," segir Erling sem vill koma því á framfæri að orð hans hafi verið slitin úr samhengi sem birtust á vef N4. Hann vill meina að hann hafi ekki sagt í viðtalinu: "Þetta var okkar húmor og fólk verður að geta tekið því. Þessir menn eru í opinberum stöðum og þurfa að spara í ár."

Aðspurður segir Erling að það hafi verið starfsmennirnir sjálfir sem útbjuggu auglýsinguna en það hafi ekki verið auglýsingastofa sem stóð þar að baki. Spurður hvernig þeim hafi dottið í hug að nota persónur með þessum hætti án þess að nokkur væri spurður um leyfi sagði Erling að það væru fordæmi fyrir þessu.

„Til að mynda er forseti Íslands ítrekað notaður í auglýsingum fyrir Kaffi Zimsen í Reykjavík. Þetta var hálfgerð tilraun hjá okkur sem fór úrskeiðis," segir Erling að lokum.