Þorsteinn dæmdur sekur í héraðsdómi - þarf að greiða sekt

Þorsteinn Húnbogason, fyrrum sambýlismaður Sivjar Friðleifsdóttur alþingismanns, var dæmdur sekur í Héraðsdómi Reykjavíkur dag.

Þorsteinn var ákærður fyrir brot á lögum um fjarskipti með því að hafa komið staðsetningarbúnaði fyrir í ólögmætum tilgangi og án vitundar Sivjar, sem var umráðamaður bifreiðarinnar. Er hann dæmdur til þess að greiða 270 þúsund krónur í sekt í ríkissjóð vegna athæfisins. Þorsteinn var ekki viðstaddur dómsuppkvaðninguna.

Í ákærunni sagði að hann hafi komið búnaðinum fyrir í bifreiðinni í þeim tilgangi að fylgjast með ferðum hennar á tímabilinu 21. september til og með 18. nóvember á síðasta ári. Þá kom fram að Þorsteinn hafi haft aðgang á internetinu þar sem öllum upplýsingum úr búnaðinum var safnað saman á læstan aðgang hans.

Við aðalmeðferð málsins andmælti Þorsteinn ákærunni og sagði að hann hafi sett búnaðinn í bílinn undir þeim formerkjum að þetta væri ökuriti. „Ég tók þetta á leigu til að fylgjast með og fá aksturseinkunn á son minn sem var að fá bílpróf. Það var tilgangurinn ekki að staðsetja fólk. Það er bara rangt orðalag að kalla þetta staðsetningarbúnað," sagði hann.

Hann sagði að upphaflega hafi búnaðurinn verið settur í annan bíl sem þau skötuhjú áttu en hann hafi sjálfur fært búnaðinn í annan bíl, sem sonur hans notaði meira, en Siv hefði einnig notað. Siv sagðist ekki hafa haft hugmynd um það og kvaðst ekkert kannast við að hafa rætt við Þorstein um að láta ökuriti í bílinn, hvorki þann sem hún og sonur þeirra hafði til umráða né þann sem Þorsteinn notaði.

Hann sagði að kæran sem Siv lagði fram fyrir lögreglu væri „hreinn og klár sóðaskapur." Við aðalmeðferðina lýsti Þorsteinn því þegar hann hafi farið í Perluna ásamt kunningja sínum, sem var að fara bjóða sig fram til stjórnar í stangveiðifélaginu.

Hann sagði að þegar þeir hafi komið inn í Perluna hafi hann skyndilega séð Siv vera að „pukrast út í horni með manni sem er hennar vinur og ástmaður í dag," sagði hann og benti á að maðurinn væri háttsettur lögreglumaður og bætti við: „Framkoma lögreglunnar í þessu máli ber vott af því."

Um þennan fund í Perlunni sagði Siv að Þorsteinn hafi skyndilega birst í Perlunni með manni og þeir sest fjórum borðum frá þeim. Þegar hún hafi svo staðið upp og farið, hafi Þorsteinn starað á hana niður frá Perlunni. Siv sagði að á þessum tíma hafi staðsetningabúnaðurinn verið í bílnum.

Hún lýsti einnig að Þorsteinn hafi oft birst fyrir tilviljun á ýmsum stöðum sem hún var á og hann hafi vitað mikið um það hvar hún væri stödd. „Fyrst hélt ég að þetta væri tilviljun," sagði hún. H

ún lét svo kanna hvort að slíkt tæki væri í bílnum og þegar hún fékk fréttirnar að búnaðurinn væri í bílnum lýsti Siv því svo: „Mér brá mjög mikið og var eiginlega allri lokið við það. Ég bað um að þessi búnaður yrði stafestur með skýrslu um að hann hefði fundist í bílnum."