Hot Springs hótel með áfengi á Heilsuhælinu

„Það er ekki nema von að menn séu hissa á því að verið sé að sækja um vínveitingaleyfi fyrir heilsustofnun," segir Ólafur Sigurðsson, framkvæmdastjóri NLFÍ hótel sem hefur fengið leyfi til að selja vín á heilsuhælinu í Hveragerði.

Náttúrulækningafélagið hefur rekið heilsustofnunina í Hveragerði í 55 ár. Ólafur segir að vegna tíu prósenta niðurskurðar á fjárframlögum frá ríkinu þurfi að grípa til óhefðbundinna ráða. Því verði starfsfólkið allt sent samtímis í sex vikna frí og beðið að taka sér hálfs mánaðar launalaust leyfi að auki. Á meðan, frá 20. júní til 20. ágúst, verði rekið sumarhótel fyrir almenna ferðamenn í húsnæði stofnunarinnar. Það verður gert undir heitinu Hot Springs Hotel.

„Þá kom upp ein stór spurning sem hefur nú staðið í mörgum: Eigum við að fara að bjóða upp á öðruvísi mat og jafnvel vín? Þess vegna sóttum við um þetta leyfi til öryggis en við erum ekki alveg búnir að taka lokaákvörðun um það hvort við verðum með léttvín með mat. Það eru náttúrlega ferðamenn sem myndu nýta sér þetta. Ég er hræddur um að þeir myndu ekki sætta sig við kalda vatnið," segir Ólafur.

Grænmetisfæði hefur verið aðalsmerki Heilsustofnunarinnar. Sveigt verður inn á aðrar brautir á sumarhótelinu. „Við ætlum að leggja miklu meiri áherslu á fiskinn sem við Íslendingar erum svo stoltir af, heimatilbúinn mat og auðvitað mikið af okkar eigin grænmeti. Svo verðum við kannski með einn kjötrétt - svona til þess að mæta blóðþörfinni," segir framkvæmdastjórinn.

Að sögn Ólafs sparast mest á því að ekki þurfi að ráða fagfólk í afleysingar auk þess sem mun færra starfsfólk þurfi til að sinna venjulegum hótelrekstri miðað við heilsustofnunina.

Í boði eru 180 rúm í 110 herbergjum á Hot Springs Hotel auk nokkurra íbúða. Ólafur kveðst hafa kannað stöðuna hjá öðrum seljendum gistiþjónustu á svæðinu og komist að því að sumarhótelið muni ekki trufla starfsemi þeirra.

„Sem betur fer erum við ekki að keppa við neinn á Suðurlandi því það er allt orðið fullt hjá þeim í dag. Við ætlum ekki að vera alltof ódýrir svo við sé ekki ódrengilegir í samkeppni við aðra," segir framkvæmdastjóri NLFÍ hótel.

gar@frettabladid.is