Bráðsmitandi pest með svæsnum uppköstum og niðurgangi

Heilbrigðsstofnun Suðurnesja, tvö hjúkrunarheimili og Landakot taka ekki lengur á móti sjúklingum vegna bráðsmitandi niðurgangspestar, og nauðsynlegt gæti verið að endurskoða heimsóknartíma á Landspítalanum. Þar er álagið slíkt að gangar og setustofur eru nýttar undir sjúklinga.

Fjöldi pesta reynir nú mjög á Landspítalann, einkum svokölluð nóróveira, sem veldur svæsnum uppköstum og niðurgangi. Innlagnastjóri spítalans segir að pestin virðist verða skæðri með ári hverju, ástandið sé sérlega erfitt nú.

„Að undanförnu og í nokkuð langan tíma hafa verið að koma inn á spítalann, á hverjum einasta degi, þó nokkuð af fólki sem er veikt, svo er fólk sem er að veikjast inn á spítalanum. Þetta er svo smitandi að við þurfum að einangra fólk strax og það er eiginlega þá sem úrlausnarefnið verður mjög flókið því við höfum ekki mikið af einangrunarstofum. Það er núna sem mann dreymir um nýja spítalann því þar verða einbýli og sér salernisaðstaða en það höfum við ekki í þessum gömlu húsum," segir Hildur Helgadóttir, innlagnastjóri Landspítalans.

Á Landspítalanum eru venjulega tiltæk sjúkrarúm fyrir um 657 manns en undanfarnar vikur hefur sjúklingafjöldinn farið langt yfir það, síðastliðinn fimmtudag voru þar til að mynda 730 sjúklingar.

Sjúklingum hefur því verið komið fyrir á sjúkrahótelum, setustofum og jafnvel hafa gangar verið nýttir.

„Þannig það er þröngt, það eru margir í einangrun og það er líka mikið af starfsfólki sem er frá út af þessum pestum," segir Hildur.

Þá bætist við að Heilbrigðsstofnun Suðurnesja, að minnsta kosti tvö hjúkrunarheimili í Reykjavík og Landakot taka ekki á móti sjúklingum þessa dagana vegna veirunnar. Því hefur Landspítalinn ekki getað sent þangað sjúklinga, eins og venja er þegar margir þurfa liggja inni, og það gerir málið enn erfiðara.

Hildur tekur þó fram að spítalinn ráði vel við ástandið þótt það reyni á. Hún hvetur fólk til að sýna ábyrgð og koma ekki í heimsóknir ef það kennir sér meins. Þá minnir hún á að umgangspestir valda fullfrísku fólki miklum þjáningum og því þurfi ekki að hafa mörg orð um hvaða áhrif þær geti haft á fólk sem er veikt fyrir.