Slátrun flýtt um tvær vikur

Sláturleyfishafar hafa nú í samvinnu við sauðfjárbændur ákveðið að flýta slátrun um tvær vikur. Sindri Sigurgeirsson formaður Landssamtaka sauðfjárbænda segir í fréttatilkynningu samtakanna að með þessu sé verið að bregðast við kröfum markaðarins.

Sláturhúsin munu bjóða upp á álagsgreiðslur til þeirra bænda sem ákveða að senda lömb sín snemma til slátrunar og Markaðsráð kindakjöts mun greiða bændum álagsgreiðslur sem nema 2.000 krónum á hvert lamb fyrstu sláturvikuna en greiðslurnar lækka um 500 krónur á viku eftir það.

„Eftirspurn eftir lambakjöti er mikil og með þessum aðgerðum er verið að svara henni. Lömbin eru léttari þegar svo skammt er liðið á haustið, en með álagsgreiðslum er komið til móts við bændur hvað það varðar."

Haraldur Benediktsson, formaður Bændasamtakanna, segir að þetta sé jákvætt fyrir neytendur og geti verið góð búbót fyrir bændur. „Margir bændur hafa átt í erfiðleikum vegna rysjótts tíðarfars og það er ánægjulegt ef þeir geta nýtt sér þann möguleika að senda lömb frá sér í sláturhús um miðjan ágúst. Það auðveldar bústjórnina að einhverju leyti og álagsgreiðslur gera þetta að fýsilegum kosti."

Mörgum mun eflaust þykja þetta gleðitíðindi, en í ljósi flýtingarinnar má nú gera ráð fyrir því að ferskt lambakjöt verði komið í verslanir upp úr miðjum ágúst.