Sveitarfélögin ætla ekki að hvetja til ófriðar eða átaka

„Aðilar eru sammála um að vera ósammála" segir Haraldur Freyr Gíslason, formaður félags leikskólakennara, að loknum fundi um framkvæmd mögulegs verkfalls. Fundurinn hófst klukkan ellefu í dag og lauk stuttu fyrir hádegi.

„Samband íslenskra sveitarfélaga ætlar ekki að hvetja til ófriðar við leikskóla eða átaka, en þau munu senda frá sér ný tilmæli í dag." segir Haraldur. Hann segist ekki vita hvað komi til með að felast í þeim tilmælum.

Haraldur segir þá túlkun leikskólakennara á viðmiðunarreglum í verkfalli standa, að ekki verði tekið á móti börnum í deildum þar sem deildarstjórar eru í félagi leikskólakennara.

Ekki er komin nánari tímasetning á nýjum samningafundi forsvarsmanna leikskólakennara og samninganefndar sveitarfélaganna, en áætlað er að hann fari fram annað hvort í dag eða á morgun.