Árangurslaus leit að Matthíasi

Eftirgrennslan eftir Matthíasi Þórarinssyni hefur enn engan árangur borið og fáar vísbendingar hafa borist um hvar hann gæti verið niðurkominn. „Við erum búnir að vera að púsla og fylla inn í púsluspilið, en raunverulega hefur það ekki borið neinn árangur. Við höfum fengið fáar vísbendingar um ferðir hans," segir Ágúst Svansson, aðalvarðstjóri hjá lögreglunni.

Eins og fram hefur komið fannst bifreið Matthíasar brunninn og grunur leikur á að hann hafi brunnið um mánaðamótin nóvember/desember. Þá hafi björgunarsveitir verið fengnar til að leita í kringum svæðið þar sem bifreiðin fannst. Síðan hafi fengist vísbendingar um að hann hafi verið í Bónus á Selfossi þann 17. desember síðastliðinn og jafnframt sést í Fjarðarkaupum. Þær vísbendingar hafi hins vegar ekki fengist staðfestar.

„Við erum áfram á byrjunarreit og getum ekki sent björgunarsveitir hingað og þangað. Við verðum að hafa einhvern útgangspunkt," segir Ágúst. Lögreglan vinni hins vegar áfram daglega að málinu. Ágúst segir engar vísbendingar um að nokkuð saknæmt tengist hvarfi Matthíasar.

Matthías er 21 árs gamall, um 180 sentimetrar á hæð, ljósskolhærður og talinn halda til á Suðurlandi. Þeir sem hafa upplýsingar um hvar hann gæti verið niðurkominn eru beðnir um að koma þeim skilaboðum áleiðis til lögreglunnar í síma 444-1000