Hvetja Árna Johnsen að styðja Priyönku

Au Pair fjölskylda Priyönku Thapa, nepalskrar stúlku sem barist hefur fyrir því að verða ekki send úr landi, undrast það að útlendingum, sem engan áhuga hafa á Íslandi, sé boðinn ríkisborgararéttur en Priyönku ekki.

Árni Johnsen, þingmaður Sjálfstæðisflokksins, lagði á dögunum fram frumvarp um að veita hinni rússneskættuðu Madinu Salamova ríkisborgararétt hér á landi. Madina hefur verið ólöglegur innflytjandi í Noregi frá unga aldri og ákváðu norsk stjórnvöld á dögunum að vísa henni úr landi. Lögmaður Madinu hefur lýst því yfir að hún kæri sig ekki um að vera íslenskur ríkisborgari.

Önnur stúlka, sem býr hér á landi, Priyanka Thapa á þann draum sér heitastan að fá að búa á Íslandi. Hún kom hingað til lands sem Au Pair hjá fjölskyldu Þórólfs Gunnarsson, framkvæmdastjóra í Vogunum. Í hjartnæmu viðtali í Fréttablaðinu lýsti hún því að henni biði þröngvað hjónaband snúi hún aftur til Nepal.

„Lífi mínu er hreinlega lokið ef ég fer aftur heim. Þar bíða mín gamlir karlar og ömurlegar aðstæður - í raun bara þrældómur," sagði hún en Priyanka tilheyrir lágstétt í Nepal og eina leið fjölskyldu hennar til að komast af er að brúðgumi greiði lífsviðurværi hennar.

Hér á Íslandi stundar Pryanka hins vegar nám við Keili og unir hag sínum vel. Í samtali við Vísi segir Þórólfur að hann hafi orðið afar undrandi þegar hann hefði lesið fréttir af baráttu Árna Johnsen.

„Vissulega vakti þetta furðu hjá manni þegar maður las um þetta mál. Eftir að greinin birtist í Fréttablaðinu um aðstæður Priyönku hef ég orðið var við mikinn stuðning við hennar málsstað í samfélaginu," segir Þórólfur og segir kannski ráð að Árni Johnsen kynni sér málið líka.

Priyanka fékk vistráðningu hjá íslenskum yfirvöldum þegar hún kom til landsins. Það leyfi gildir í eitt ár og er runnið út. Hún hefur sótt um dvalarleyfi hér á landi á grundvelli mannúðarsjónarmiða. Umsóknin var lögð inn í Útlendingastofnun í nóvember en Priyanka hefur ekki fengið svar.

Þórólfur Gunnarsson segir næstu skref þau að sækja um íslenskan ríkisborgarrétt fyrir Priyönku. „Það er rétta ferlið og það sem hún vill. Hún hefur áhuga á að vera hér á landinu, hún býr hjá okkur og lærir hér á Íslandi og við vonum að þing og allsherjarnefnd taki jákvætt í mál hennar."