Flóðin í Brisbane: „Staðan er orðin miklu verri en í gær“

„Staðan er orðin miklu verri en í gær. Það er orðið meira vatnsmagn í ánni og búið að loka miðborginni," segir Jón Björnsson sem búsettur er rétt utan við Brisbane í Ástralíu þar sem tólf manns hafa nú látist í flóðunum. Yfir fimmtíu manns er saknað og á fjórða þúsund hafast við í neyðarskýlum.

Eiginkona Jóns starfar í Brisbane en henni hefur verið tilkynnt að mæta ekki til vinnu fyrr en á mánudag.

Búist er við að háflóð verði í fyrramálið en að vatnsmagnið fari hægt minnkandi eftir það. „Þeir halda að það verði háflóð í kannski 24 tíma og fari svo lækkandi upp úr miðjum degi á föstudag. Vatnshæðin verður líklega ekki komin niður fyrir þrjá metra fyrr en á sunnudag eða mánudag," segir Jón.



Tapa innbúinu í annað sinn

Fjölskylda Jóns og vinir hafa sloppið vel en gríðarlegur fjöldi fólks hefur misst heimili sín undir vatn. „Fólk er auðvitað miður sín að tapa heilu búslóðunum. Þetta er svakalegt áfall," segir Jón.

Mikil flóð urðu á þessu sama svæði fyrir tæpum 40 árum og segir Jón að tengdafaðir hans hafi sérstaklega ráðlagt þeim hjónum að kaupa sér ekki húsnæði í nágrenni við fljótið. „Hér er eldra fólk sem missti allt innbúið sitt þá og er að missa allt innbúið sitt aftur," segir hann.

Heimili nóbelsverðlaunahafa undir vatn

Jón hefur fengið fregnir af því að einn þeirra sem hefur misst hús sitt undir vatn sé nóbelsverðlaunahafinn Ian Frazer sem þróaði bóluefni gegn leghálskrabbameini og var árið 2006 valinn Ástrali ársins. Hann hafði lagt í miklar endurbætur á heimili sínu en er það líklega allt tapað í flóðunum.

Talið er að um 900 þúsund ferkílómetrar séu nú undirlagðir vatni, eða ríflega hálft Queensland-fylkið.

Jón hefur sérstaklega orð á því hversu vel björgunarsveitarmenn hafi staðið sig í þessum miklu hamförum.

Hér meðfylgjandi má sjá nýtt fréttamyndband af svæðinu frá ITN fréttastofunni.