„Þetta er eins og í amerískri bíómynd“

Um eitt hundrað þúsund heimili í áströlsku borginni Brisbane gætu farið undir vatn á næsta sólarhringum. Íslendingur sem þar býr segir íbúa byrjaða að hamstra nauðsynjavörur enda flóðin þar þau verstu í meira hundrað ár.

Eftir nær stanslausar rigningar síðan í september er ástandið í Queensland orðið afar alvarlegt. Tíu fórust þegar skyndiflóð skullu á bænum Towooba í gær en nú hækkar vatnsyfirborðið í ánni sem rennur í gegn um Brisbane, langstærstu borg Queenslands en þar búa tvær milljónir manna.

Yfirborðið hækkaði um tvo metra í dag. En spár gera ráð fyrir að vatnstyfirborðið eigi eftir að hækka um þrjá og hálfan metra í viðbót. Rafmagn verður tekið af stórum hluta borgarinnar á morgun og íbúar eru byrjaðir að búa sig undir það versta.

„Það er mikil spenna hérna og mikið panik í dag. Fólk fór að hamstra í búðum við fórum í eina búð og ætluðum að kaupa okkur vatn og þess háttar, en það var allt búið," segir Björgvin Þorsteinsson, verkfræðingur sem býr í Brisbane.

Um 200 íslendingar búa í Brisbane og nágrenni. Björgvin býr þar ásamt konu sinni sem er kasólétt og átta ára dóttur þeirra. Þau ætla að flýja heimili sitt vegna þeirrar óvissu sem einkennir ástandið. Almannavarnir séu ekki öflugar og alls óvíst hvort aðgangur að vatni og helstu nauðsynjum verði greiður næstu daga.

„Þetta er svo óghuganlegt, þetta er risastór á sem hækkar janft og þétt. Og allt í einu fannst dóttur minni, þegar við vorum í bílskúrnum í dag, að hún gæti ekki farið neitt og fór að gráta. Þetta er eins og í amerískri bíómynd, þetta er eins og stríðsástand, þú getur ekkert gert," segir Björgvin að lokum.