Gríðarlegt álag hjá þjónustuveri OR vegna vatns- og fráveitugjalda

Nú um áramótin tók Orkuveita Reykjavíkur við innheimtu vatns- og fráveitugjalda í þeim sveitarfélögum þar sem fyrirtækið á og rekur þessar veitur - í Reykjavík, á Akranesi og í Borgarbyggð. Greiðendur munu fá sérstakan álagningarseðil frá OR ásamt upplýsingabæklingi um breytinguna. Hingað til hefur verið greitt fyrir þjónustuna með fasteignagjöldum sveitarfélaganna.

Greiðslum samkvæmt álagningunni verður dreift á níu gjalddaga yfir árið og munu greiðendur fá senda greiðsluseðla með rafrænum hætti í heimabanka. Þá stendur til boða að greiða gjöldin í einu lagi.

Þjónustuver Orkuveitunnar tekur við óskum um breytingar á greiðslumáta og er gríðarlegt álag á símkerfi orkuveitunnar sem stendur.

Fráveitugjald framvegis eins og vatnsgjaldið

Samhliða verða þessi gjöld samræmd þannig að fráveitugjaldið mun taka mið af stærð húsnæðis, eins og vatnsgjaldið, en ekki fasteignamati eins og hingað til. Áhrif á einstaka gjaldendur eru misjöfn.

Í Reykjavík koma þær eignir sem hafa hátt fasteignamat miðað við fermetrafjölda hagstæðar út úr breytingunni en þar sem matið er lágt á hvern fermetra húsnæðis.

Eigendur húsnæðis sem er minna en 200 fermetrar og fasteignamat í meðallagi geta átt von á hækkun sem nemur um 12%. Það eru 82% húseigna í Reykjavík. Almennt má reikna með að hækkunin verði meiri á stærri eignir en rétt er að ítreka að um meðaltöl er að ræða. Breyting á upphæð gjaldsins fyrir hverja eign veltur alfarið á áðurnefndu samhengi fermetrafjölda og fasteignamats.

Algengustu stærðir íbúða og meðaltalsáhrif breytinganna



Af 50-100 fermetra íbúð í Reykjavík voru greiddar 18.076 krónur að meðaltali í holræsagjald árið 2010. Fráveitugjaldið 2011 mun nema að jafnaði 20.375 krónum. Hækkunin er 2.299 krónur eða 192 krónur á mánuði.

Af 100-200 fermetra íbúð í Reykjavík voru greiddar 28.868 krónur að meðaltali í holræsagjald í ár. Fráveitugjaldið mun nema að jafnaði 32.322 krónum. Hækkunin er 3.454 krónur milli ára eða 288 krónur á mánuði.

Rúmlega átta af hverjum tíu húseignum í Reykjavík eru innan við 200 fermetrar að stærð.

Aukið jafnræði

OR hóf rekstur fráveitna árið 2006 með samningum við nokkur sveitarfélög. Þau lög sem þá giltu um starfsemina gerðu ráð fyrir að sveitarsjóðir gætu innheimt holræsagjald, sem hlutfall af fasteignamati. Tekjur OR hafa hinsvegar frá upphafi miðast við gjald á matseiningu, með sama hætti og vatnsgjaldið. Ástæðan er sú að kostnaður við rekstur vatns- og fráveitna sveiflast ekki eftir fasteignamarkaðnum eins og fasteignamatið. Þá geta samsvarandi eignir, þar sem notkun á þessum kerfum er svipuð, notið afar mismunandi fasteignamats. OR lítur því svo á að með breytingunni aukist jafnræði milli gjaldenda fráveitugjaldsins.

1% hækkun til OR

Álagning sveitarfélaga á fráveitugjaldi hefur almennt verið önnur en sú aðferð sem OR var greitt eftir. Það gat skapað mismun og gerðist það í Reykjavík á síðasta ári. Þá innheimti borgarsjóður 300 milljónum króna minna af notendum en hann greiddi OR samkvæmt samningi. Þessi mismunur fellur á gjaldendur nú. Þess vegna er hækkunin 18,5% vegna fráveitna í Reykjavík en tekjuauki OR nemur 0,92%.

Þessi breyting á álagningu fráveitugjalds hefur þegar verið innleidd í Borgarbyggð. Á Akranesi verður ekki heildarhækkun á gjaldinu, þar sem mismunur á innheimtu bæjarsjóðs og greiðslu til OR var jákvæður.

Nýtt fyrirkomulag var innleitt nú um áramót og munu álagningarseðlar berast inn á hvert heimili í sveitarfélögunum fjórum á næstu dögum ásamt upplýsingabæklingi um breytingarnar.

Þetta kemur fram á vef Orkuveitunnar þar sem einnig er hægt að finna nánari upplýsingar, or.is